Pathianni zan dar 9:00-ah League Cup final Manchester City Vs Tottenham
Nomawi inchuha Jose Mourinho leh Pep Guardiola inhmachhawn hun khawvelin an ngaihchan ṭhup laiin Tottenham Hotspur-in Portuguese manager Mourinho an ban a, Pathianni zan dar 9:00-a Manchester City leh Tottenham inkhel tur boruak a danglam nghal vek.
Man City hi FA Cup semifinal-ah Chelsea hneh loin tla mah se Spurs tan chuan an ṭha mah mah deuhin niin a ngaih theih a, amaherawhchu Wembley Stadium-a khelh tur hi final a nih miau avangin engpawh thleng thei a ni.
Final kalkawng
Man City-in final thleng turin Bournemouth (2-1), Burnley (3-0), Arsenal (4-1) leh Manchester United (2-0) te an hneh a, quaterfinal leh semifinal-a an khingpui thlir hian final kalkawng hi a awlsam lo tih a lang.
Pep Guardiola-a'n League Cup match liah Zack Steffen a chhawr vek a, FA Cup semifinal-a Chelsea an hneh loh ṭum pawhin United States number 1 keeper Steffen hi a hmang. Spanish manager hian League Cup final-ah pawh Steffen a chhawr a rinawm, chutihrualin City number 2 hian number 1 keeper Ederson a tluk lo tih chu khelmuala chet dan aṭangin a la chiang hle.
Tottenham hian final Lyeton Orient (walkover), Chelsea (1-1, 5-4 P), Stoke City leh Brentford (2-0) te an hneh thung a, Man City aiin an kalkawng awlsam zawkin lang mah se Blues an hneh avangin inrintawkna an nei ang.
Spurs hi Mourinho hoa khel a nih miau avangin match tinah hian an ṭhat dan bera an luh loh pawhin chumi hnaih thei ang ber chuan an khel a, tun ṭumah hian manager lailawk Ryan Mason-a hoin khel dawn mah se final a nih miau tawh avangin sa huai an ser nghal ang.
UCL nge League Cup?
Manchester City buaina tur chu April 28, Nilaini zanah Paris khawpuiah French champion Paris Saint-Germain an hmachhawn dawn a, Pep Guardiola-a'n nomawi lak theih zinga a ngaih pawimawh ber UCL thlir chungin League Cup-ah player a rem ang.
Chumi awmzia chu inhliam keeper Steffen-a'n bul a ṭan ngei dawn a, inhliam vanga chawl mek Kevin de Bruyne pawh dam chiang lo chungin an chhawr lui lo ang. Aston Villa an hneh ṭuma hnawhchhuah John Stones an chhawr dawn lo a, Ruben Dias leh Aymeric Laporte te an awm theih avangin buaina tur erawh a awm lo.
Tlarhma a rem dan tur ber hi hriat châkawm chu a ni a, Chelsea nen an inkhelh ṭumin tun hnaia che ṭha lo Raheem Sterling leh Ferran Torres ten bul an ṭan a, an goal bawh a na lo. Amaherawhchu PSG nena an inkhel tur a thlir tel a nih chuan tu emaw zawk hi chu a chhawr a ṭul si. Man City goal bawh ti na tur chuan Phil Foden, Ilkay Gundogan leh Bernardo Silva te zing aṭangin pahnih tal an awm a ṭul ang.
Man City hian tun hnaiah League Cup inelna hi an thunun hneh hle. Season liam ta khan Aston Villa hnehin champion lai an ni a, inelna hnuhnung pasarihah vawi nga ngawt an champion. Pep Guardiola hote hian Spurs an hneh theih chuan champion ngun ber Liverpool nih rualin vawi riat ve ve nomawi an chawi ang.
Nomawi duha tuihal
Tottenham-in Mauricio Pochettino bana Mourinho an lakluh chhan chu nomawi an duh vang a ni a, Portuguese manager-in an beisei a phak loh avangin kum 28 mi Mason chungah mawhphurhna a tla a, hmabak a huphurhawm dawn hle.
London club hian kum 2008-a Chelsea hneha League Cup nomawi an chawi hnuah inelna lian thamah an champion leh tawh lo a, Manchester City aiin League Cup nomawi chawi an châk zawk. Spurs hian Europe inelnaah beisei tur an neih tawh loh avangin Mason-a'n a duh thala ṭha player a thlang thei dawn.
Chutihrualin inhliam vangin Harry Kane dinhmun a chiang lo a, English striker hi 100%-a a dam hman lo a nih pawhin Mason hian a khelh luihtir tho a rinawm a, hei tak hi tun ṭum League Cup final hmuhnawmna tur chu a ni.
Man City hian an inhmachhawn hnuhnun berah 3-0 in hnehna chang mah se Spurs hian nikum November thla khan 2-0 in an hneh ve tho tih hriat a ṭha a, Kane bakah Son Heung-min leh Gareth Bale te awmna team hian Pep Guardiola hote hi an barakhaih thei ang.
Tottenham-in League Cup final an luh hnuhnun ber chu kum 2015 kha a ni a, Spurs hian final-ah Chelsea 2-0 in an hneh lo. Tottenham tan hian tun ṭuma manager lailawk Ryan Mason hian bul a ṭan a, bul ṭantu dang zingah Harry Kane, Eric Dier leh Hugo Lloris te an tel. Tun ṭumah erawh Kane, Dier leh Lloris te hi Mason-a kaihhruaina hnuaiah an khel zawk dawn a ni.
