Ibrahimovic a inkhel zel dawn

October 3 hian kum 40 a tling tawh dawn, a kum tam deuh tawh mah se Zlatan Ibrahimovic-a'n chawlh mai a la tum lo. Swede striker hian AC Milan tan kum khat daih contract a ziak thar.

Ibra hian December, 2019 khan a vawi hnih nan Milan hi a zawm, a tirah chuan thla ruk a tan a ni - a hnuah thla ruk bawk a pawtsei. Tunah chuan kum khat atan a ziah belh leh ta.

Season kal laiah Ibrahimovic hian Milan tan inelna hrang hrangah match 25 a khelh aṭangin goal 17 a khung a, club tan ani aia goal khung hnem an awm lo, hliam vangin a chawlh ngai lo se a khel tam zual ngei ang.

Ibra chuan, "AC Milan hi ka tan chuan in ang mai a ni a, min kaihhruai leh enkawl dan hi a nuamin a lungawi thlak takzet. Theih ni se chu he hmunah hian damchhunga awm mai pawh ka duh awm e," a ti.

Malmo aṭangin 1999 khan Ibra hian a football zinkawng a zawh ṭan, a hnu lamah - Ajax, Juventus, Inter Milan, Barcelona, Paris St-Germain, Manchester United leh Los Angeles Galaxy tan te a khel kual tawh.

Premier League, Serie A, La Liga, Ligue 1 leh Champions League-ah te a match hmasa berah goal a khung vek a, hetiang ti thei hi Ibrahimovic ni lo chu player dang an awm ve lo.