Nadal-a'n fiahna hautak paltlang

Barcelona Open khelh laiah Rafael Nadal a la kal fawr hleithei bik lo. Spanish player hian vawi hnih champion tawh Kei Nishikori hnehin quarterfinal a in vaw kai a, a vawi 12 nan champion a la beisei zel.

Ningani zan inkhelah Nadal hian set hmasa berah game a hloh miah lo, mahse set hnihnaah game hnih chauh a la thung. A tawpah erawh clay court hmangthiam a nihna langin 6-0, 2-6, 6-2 in hnehna a chang.

Monte Carlo quarterfinal-ah khan Andrey Rublev hneh loin Nadal a tla a, vawi 11 zet a champion tawhna Barcelona Open-ah pawh match hnih a khelh tawh chinah set a la hloh ve ve, season dang a la phak rih lo viau.

World number 3 Nadal chuan, "Season hmasa khan ka inkhel tam lo, chuvangin tournament pangngai khelh chinah harsatna ka tawk. Hmasawn thut theih a ni bik lo, chutih rualin zawimuangin hma ka sawn zel ang. Kawng dik ka zawhin ka hria," a ti.

Nadal hian a match lehpekah chuan Cameron Norrie a hmachhawn dawn. Britain tlangval hi David Goffin hmachhawn tur a ni a, mahse a khingpui tur hi hliam vanga a inlan thei loh avangin inkhelh hah ngai loin a tlang.

Inkhel dangah seeded pahnihna Stefanos Tsitsipas chuan Alex de Minaur 7-5, 6-3 in a hneh a, champion tura rinkai zinga mi Rublev pawhin Albert Ramos-Vinolas 6-4, 6-7 (4), 6-4 in a hneh ve bawk.

Season hmasa khan hripui leng vangin Barcelona Open hi khelh theih a ni lo, kuminah erawh a hmunah entu awm thei lo mah se an khel tlang lui. May thla tawpa khelh tur French Open inbuatsaih nan an hmang.