Hun ṭha kan khawhral - Conte

Inter Milan chuan goal hnih an phurh hnuah sut zo hramin Parma nen 2-2 in an inhnehtawk a, manager Antonio Conte chuan hun ṭha an insiam tam tak an khawhral vanga point an hloh thu a sawi.

Parma tan Arsenal forward hlui Gervinho-a'n minute 46 leh 62-naah goal khungin a team hi si hnih faiin hma a hruai pui a, team ṭha zawk lakah point thum hmu tura ngaih pawh an ni hman.

Mahse Inter lamin minute 64-naah Marcelo Brozovic hmangin an sut ṭhen a, hun pek belhah Ivan Perisic chuan an si phurh sut zawhna a tauh lut hram, harsa takin point khat an sual chhuak.

Inter coach Conte chuan, "Tun ṭum chauh hi a ni lo, match dangah pawh hun ṭha insiam ṭeuh chung sia chak zawh loh chang kan nei, a hmawr bawk dan ṭha hi kan hriat a pawimawh.

"Parma lam khan an khel ṭha, chutih rualin goal zawna an pet vawi hnih a luh ve ve avang erawh chuan an vannei hle. Team dang khelh ṭhat leh ṭhat loh hi buaina tur a ni lo a, keimahni lam kan khel ṭha em tih kha a pawimawh zawk chu a ni," a ti.

Season hmasa Serie A pahnihna Nerazzurri hian match ruk an khelh aṭangin point 11 an nei a, an mahni aia match khata khel tlem leh hmahruaitu ni bawk AC Milan chu point hnihin an phak lo.

Inrinni zan Italian Serie A inkhel dangah Atalanta chuan Crotone 2-1 in an hneh a, a zawna league match hnih an tlawm hnuah Gian Piero Gasperini enkawl team tan Luis Muriel chuan goal hnih khungin point thum an hlawh chhuak.