Pathianni zan dar 6:30-ah 'English football Clasico'

Manchester United midfielder Fred chuan Manchester United leh Leeds United inkhel chu 'English football Clasico' hming vuah an phu thu a sawi. Khawvelin Real Madrid leh Barcelona inkhel chu 'El Clasico' tih a pawmpui a, German football-ah chuan Bayern Munich leh Borussia inkhel chu Der Klassiker (German Clascio) tih a ni bawk.

Pathianni zan dar 6:30 hian Leeds United-in Elland Road-ah Manchester United a mikhual dawn a, club pahnih hi an inhal em avangin inkhel hian ngaihven a hlawh ṭhin. Tun season-a Old Trafford-a an intawn hmasak ṭumin Ole Gunnar Solskjaer-a hoten 6-2 zetin Leeds United hi an sawp a, Man United hian an goal nawr apiang an khungah a ngaih theih.

Old Trafford-ah hian mualneitu hi chak chiang viauin lang mah se Leeds United manager Marcelo Bielsa chuan a player-te chu goal khung tum turin a hrilh char char. Argentine manager hian 4-1 emaw 6-1 emaw a nih hnuah pawh a naute hi attacking football khel turin a hrilh a, hei hian inkhel a tih hmuhnawm phah hle.

Leeds hian Bielsa huaisen vangin goal hnih an khung phah a, an vanneih ṭum chu ni se goal tam zawk khung thei tur a ni. Season liam ta Championship champion Leeds hian an match hnuhnung berah Liverpool an chelh a, 1-1 in an inhnehtawk.

Reds nena an inhnehtawk hma hian Manchester City chu 2-1 in an hneh a, Elland Road-a inkhelh tur a nih bawk avangin Bielsa hote hi Man United mikhual turin an inpeih khawp ang.

Manchester United erawh European Super League boruak a irh chhuah hnuah an inkhelh hmasak ber tur a ni dawn a, khelmual pawn boruak hian team chhung boruak a nghawng dan chu Leeds an hmachhawn hunah hian a hriat theih ang.

Ningani khan Man United ṭantute ṭhenkhat chuan first team training-na Carrington ground-ah an lungawi lohna an lantir a, Norwegian manager Solskjaer te hoin fan-te hi an hnawt kiang.

Solskjaer-a'n Leeds hmachhawn turin Anthony Martial chu inhliam vangin a chhawr theih a rinawm lo a, player dang erawh an dam kimah a ngaih theih.

Man United tlarhmaa awm rawlthar Mason Greenwood leh veteran Edinson Cavani ten en bik an hlawh ang. Leeds lamah captain Liam Cooper chu hrem vangin a khel thei dawn lo a, Rodrigo leh Raphinha te hliam vangin an dinhmun a chiang lo bawk.