Record siam turin Lewy a rawn kir dawn

Bayern Munich-in zanin dar 7:00 hian Mainz an tlawh dawn a, hnehna an chang a nih chuan Bundesliga-ah an champion dawn. Match li khelh tur a la awm avangin zanin hian Bavarians hi chesual mah se nomawi an chawi ngei a rinawm tawh a, hemi a nih avang hian Robert Lewandowski rawn kir tur chuan ngaihven a hlawh zawk.

Polish striker Lewy hi March thla tawpa an ram Poland tana a fehchhuahnaah a inhliam a, a awm loh chhungin Bayern Munich hi Champions League aṭangin an tla. Lewy hian league match 25 aṭangin goal 35 a khung tawh a, season khata Bundesliga goal khung tam ber record a siam thei ang em tih chu khawvel hriat châk a ni.

Bayern legend Gerd Muller chuan 1971/72 season khan season khatah goal 40 a khung a, Lewy hian Muller-a record nih rual tur hian match liah goal nga khung a la mamawh.

Borussia Dortmund striker hlui Lewandowski chuan, "Ka ti thei ang em tih ka hre lo. Amaherawhchu khelmuala ka let hunah chuan ṭan phat aṭangin ka ṭhat dan berin khelh leh ka tum dawn a, goal pawh khung ka tum ang," tiin a sawi.

Bavarians hian an match hnuhnung berah Wolsburg 3-2 in an hneh a, inkhelh zawhah Hansi Flick chuan player-te bulah season tawp ruala a contract tih tawp a dil thu a hrilh. Amaherawhchu Bayern hotuten Flick hi chelh an la duh a, Mainz nena inkhelh zawh hian a hmalam hun chungchang hi an sawipui dawn.

Hansi Flick chuan, "Nilainia kan training session-ah Lewy hi a che ṭha hle. Hma taka a rawn let hi kan lawm a, Mainz hmachhawn tur zingah a tel thei ang," tiin Mainz hmachhawn tura Lewy inpeih thu a sawi.

Germany coach Joachim Low-a'n Euro C'ship zawhah a hna kalsan a tum avangin a hmunruak hi kum 56 mi Flick hian a hnawhkhat turah an ngai. Chutihrualin tun thleng chuan Germany Football Association (DFB) chuan Flick hi official-in an la be lo.

DFB director Oliver Bierhoff chuan, "Club nei lai coach kan biak hi chu a rem lo a ni," tiin a sawi. Season khat leh a chanve lek chhunga Bayern nomawi paruk lakpuitu Flick hi Juventus nen pawh sawi zawm a ni.