Leicester an chak - top four a chiang lo zel
Premier League match hnih zet a zawna an tlawm hnuin Leicester City an chak ve leh ta a, season tharah Champions League khelh an tum tih pholangin West Brom chu 3-0 in an hneh.
Foxes tan Jamie Vardy, Jonny Evans leh Kelechi Iheanacho-ten goal khat ṭheuh an khung a, tla thei dinhmuna ding mek Baggies-in a chhanletna tur an nei lo.
Leicester-in hnehna an chan avangin table-a pathumna dinhmun chu an sawhnghet a, palina Chelsea aiin point liin an sang mek - Blues hian zanin dar 10-ah West Ham an lenchilh dawn a, team pahnih hi an point hmuh zat a inang.
Top four-a awm la beisei zingah Liverpool chu vawiin tlai dar 5:00-ah an inkhel dawn bawk a, Newcastle United an mikhual ang.
Foxes beiseina
Leicester-in an league match hnuhnung pahnihah Manchester City (2-0) leh West Ham (3-2) an ngam loh laiin West Brom erawh a zawna chak hlim an ni a, Premier League-a inhamtan an beiseina chhi nung turin Chelsea (5-2) leh Southampton (3-0) chu a zawnin an hneh.
Baggies result hnuhnung pahnih enin eng pawh a thleng thei tih a chiang a, Brendan Rodgers-a naute chak tur chiang saa dah an harsa - mahse, a zawna point hlawh chhuak thei lo Foxes hian thawnthu dang ziah an tum tawh.
Minute 23-naah goal an khung ṭan a, Vardy chuan goal hmahruai hi a khung - English striker hian minute 36-naah Kelechi Iheanacho khung tur ṭha takin a siamsak bawk a, striker pahnih goal khung karah Evans chuan minute 26-naah a khung ve bawk.
Leicester boss Brendan Rodgers chuan, "Team dang ka ngaihtuah lo a, keimahni chauh kan inngaihtuah a ṭul. Kan tihdanglam theih awmchhun chu kan khelh dan a ni," a ti a, Champions League khel tur chuan team dang ni loin anmahni result a pawimawh ber thu a sawi zui.
Blues inlan hun
West Brom manager kam tam ve tak Sam Allardyce-a'n Foxes an ngam loh hnu lawkah, "Leicester hi Southampton aiin an ṭha zawk a, Chelsea aiin a letin an thiam zawk," a ti kher a, Chelsea thin a khei khawp ang.
Mahse, Big Sam hian Chelsea hi a ngam tlat; 5-2 in a hneh tawh miau a, a ngam loh zawk Foxes-a dah sang zawk hi a mak lo. Chelsea hian Baggies an ngam loh hnuah 4-1 in Crystal Palace an hneh a, mahse, Brighton & Hove Albion nen 0-0 in an inhnehtawk zui.
Chelsea-in Brighton an inhnehtawkpui lai hi European Super League lama an dinhmun tur a chian loh lai a ni a, coach Thomas Tuchel chuan, "ESL-in kan rilru a la peng a ni," tiin an ṭhat dan bera an khelh loh thu a sawi.
ESL aṭangin Chelsea an inhnukdawk a, Blues-a pan hnua danglamna thlentu Tuchel tan chhuanlam tur a awm tawh lo - West Ham lakah fan-ten point thum aia tlema lungawi an tum lo ang.
Hammers an ṭha
David Moyes-a enkawl West Ham ṭhatzia sawina awlsam ber chu Tuchel-a hnuaia an sawi vul chuk Chelsea nen an point hmuh zat a inang mek - London Stadium-a an league match hnuhnung pangaah Hammers hi an tlawm lo.
Chelsea tan London Stadium-ah a chetsual theih tihna a ni a, chutihrual chuan Chelsea tan chanchin lawmawm a awm - defender pawimawh Aaron Cresswell leh Arthur Masuaku dinhmun a chiang lo a, Blues nena sawizawm Declan Rice chu a inlan thei dawn lo chiang bawk.
Hetihrual hian an league match hnuhnnung bera hliam vanga lakchhuah ngai Jesse Lingard dinhmun a ṭha a, English attacking midfielder hian Hammers tan league match 10-ah goal kua khunga assist vawi li neiin career duhawm tak a hmang mek - Chelsea tan ngaihthah a thiang lo ang.
Chelsea tan Mateo Kovacic dinhmun a ṭha lo tih loh chu buaina tur a awm lo a, Tuchel-a'n a duh ang taka rem turin player a nei thei dawn - duhthlangin German coach a buai zawk dawn tihna a ni.
Hei le Liverpool
Liverpool-in an league match hnuhnung berah 1-1 in Leeds United an inhnehtawkpui a, he inkhel pawh hi European Super League bawkin a hliah khuh - zaninah erawh ngaihtuahna thar nen Liverpool an inlan thei dawn.
Leeds an hmachhawn ṭumin Klopp-a'n Champions League khel tur chuan an tan point hloh a thian tawh loh thu a sawi a, an hloh nghal - top four ni tur chuan an dinhmun a chhe ta viau a, table-ah pasarihna an ni mek!
Premier League champion hian league match ruk chiah khelh tur an neih tawh avangin an chak piahlamah an khingpui chetsual an chan tel a ṭul tihna a ni a, an kutah a innghat ta lo.
Liverpool-in inhliam an kawl sa tih loh chu player inhliam tharlam an nei lo a, league match ruka an hmachhawn tur zingah Manchester United an tel bawk avangin Newcastle lakah chak a ṭul.
