Clay-ah Halep a chak nghal

Simona Halep chuan a inkhelh thiamna clay court season a hmang ṭan a, world number 3 hian harsa lo takin a khingpui Marketa Vondrousova lakah 6-1, 6-3 in hnehna a chang.

Kum 29 mi Halep chuan, "Tennis khelh hrim hrim hi nuam ka ti, a bik takin clay court-ah ngei mai inkhelh hi chu a nuam zual. Hliam dam hlim ni mah ila harsatna ka nei lo," a ti a, inelna lian French Open atana inbuatsaihna a nih nghal thu a sawi bawk.

Inkhel dangah Elina Svitolina chu a dinhmun hniam zawk viau hman hmasa mah se, major title vawi thum la tawh Angelique Kerber 7-6 (4), 6-3 in a hneh. Set khatna tie break an khelh laiin Svitolina hi a hniam hman hial, mahse point hmuh belh tur awm thei pasarih zinga paruk hmuin a ding chang.

Seeded pangana Aryna Sabalenka pawhin Anna-Lena Friedsam 6-4, 6-2 in a hneh. Sabalenka hian Sofia Kenin hnehtu Anett Kontaveit a hmachhawn ve leh dawn a ni.