Paris lamah Thiem a kal dawn lo

Dominic Thiem chuan tun kar chhunga khelh tur Paris Masters-ah a inlan loh tur thu a sawi, Paris khawpuia inelnaah hian world number 1 Novak Djokovic pawh a inlan dawn lo tih a chiang tawh.

US Open champion Thiem hian an ram Austria a inelna neih Vienna Open-ah a nomawi kawl lai a hloh a, tun hnaiah tournament a khelh ngun avangin chawlh a duh a ni.

Djokovic leh Thiem inlan dawn lo mah se Rafael Nadal chu a inlan dawn. Spanish tlangval hi seeded pakhatna pek a ni ang a, hard court inelnaah hian champion tura rinkai ber a ni bawk ang.

Grand Slam vawi 20 champion tawh Nadal hi first round-ah chuan a 'bye' dawn, second round-ah chuan Filip Krajinovic leh Feliciano Lopez inkhela chak zawk a hmachhawn dawn a ni.

ATP Finals khelh tum Andrey Rublev leh Diego Schwartzman te pawh Paris Masters-ah an inlan dawn a, tun hnaiah anni pahnih hi an khelh ṭhat lai a nih avangin Nadal tan pawha hmachhawn harsa tur an ni ang.