Halep-i'n hri leng a kai

Simona Halep chuan coronavirus a kai tih hmuhchhuah a ni a, hmeichhe tennis world number 2 hian natna nei mah se nasa tak a nei lem lo a, khunghranna hmunah enkawl mek a ni.

Kum 29 mi Halep chuan, "Covid-19 ka kai ve hlauh mai, ka chenna inah khung hran mek niin enkawlna ka dawng ṭha hle a, natna nei ve mah ila hlauhawm leh hrehawm tham chu a ni lem lo.

"Ka dinhmun a ṭha, engtikah emaw chuan tennis khel turin ka rawn kir leh thuai ang," tiin a sawi. Romanian nula hian hri leng hi a hlau viau a, kai a hlauh vangin US Open pawh a khel lo hial.

French Open-ah erawh Halep a inlan thung a, clay court inelna lianah hian last 16-ah a chak lo, a hneh loh hi champion zui ta Iga Swiatek kha a ni - Roland Garros hnu hian tun season chhunga a inkhelh tawh loh tur thu a ti chiang tawh a ni.