Hei le Romelu Lukaku

Napoli khelmual San Paolo Stadium hi Inter Milan tan hmun ralṭi a ni a, 1997 aṭang khan Serie A match an khelh tawhah hnehna an la chang ngai lo. Tunah chuan record duhawm loh zet mai an neih hi Romelu Lukaku hmanga thai chhiatin a awm ta, 3-1 in Napoli an luhchhuah.

Manager thar Gennaro Gattuso kaihhruaina hnuaia a vawi khat nan Napoli hian Sassuolo an hneh a, beiseina an nei thar. Mahse, Inter Milan lakah hliam vangin Kalidou Koulibaly, Nikola Maksimovic, Dries Mertens, Faouzi Ghoulam leh Kevin Malcuit te an chhawr thei lo a, an tuar chiang hle.

Manchester United striker hlui Lukaku-a'n minute 14 leh 33-ah goal khungin a team hma a hruai pui a, mualneitu lamin Arkadiusz Milik hmangin sut ṭhen mah se Argentine striker khel ṭha tluang tak Lautaro Martinez chuan an chak nemnghehna a khung belh.

Inter manager Antonio Conte chuan, "Mitin mai hian counter attack hmang nasa tiin min sawisel ṭhin, keini lam erawhin tun ṭumah pawh khan Napoli kha anmahni goal bul hnaiah a na thei ang berin kan nawr zawk a ni.

"Engkim mai kha a nih dan tur hunah tak zel ṭha takin kan ti thei, hun rei tak chhung point thum kan hmuh theih ngai lohna hmunah hnehna hlado kan chham theih avangin fans lam pawh an lawm ngei ka ring," a ti. Italian manager hian Lukaku chu Juventus leh Chelsea a enkawl lai aṭang tawha a striker duhzawng a nih thu a sawi tel bawk.

Carlo Ancelotti thlaktu Gattuso chuan, "Napoli ka zawm aṭanga kan khelh ṭhat ber ṭum kan tawng, mahse tihsual zeuh kan neih avangin a chak lo zawkah kan ṭang. Player hliam kan ngah a, a bik takin Kalidou Koulibaly leh Nikola Maksimovic te awm lo chuan tlarhnung remphui a harsa," tiin a sawi.