Real tan Hazard; Barca an chak thei lo

Kum khat chuang hnua a vawi khat nan Eden Hazard chuan goal a khung ve leh ta a, Belgian forward telna Real Madrid chuan 4-1 in Huesca an sawp. 

Real tan Karim Benzema chuan goal hnih a khung ve bawk a, Federico Valverde chuan goal khat a khung ve bawk - Huesca tana David Ferreiro goal khungin awmzia a nei lo. 

Barcelona tan Antoine Griezmann chuan tun season-a a goal hmasa ber khung mah se a team a chakpui zo lo a, Alaves nen 1-1 in an inhnehtawk. 

Mualneitu Alaves hian Luis Rioja hmangin goal hmahruai an khung hial a, midfielder Jota chu minute 62-naah hnawhchhuah a ni mah mah - Barca-in kim loa khel Alaves an hneh thei lo a, league match li chhung chu a zawnin an chak ta lo. 

Kum 29 mi Hazard hian kum 2019 khan Chelsea aṭangin Real Madrid a zawm a, Cristiano Ronaldo hmun ruak zau tak luah tura beisei a ni - a man pawh pound maktaduai 150 thlenga sang chho thei tura tih a ni.

Mahse, Hazard hian hliam vangin beisei a phak lo a, fitness lamah buaina a nei bawk - season hmasa khan inelna hrang hrangah match 22 khelin goal khat chiah a khung. 

Hazard hian league nomawi chawi mah se a career-a season duhawm lo ber a hman thu a sawi a, beiseina sang tak nen season thar thlir mah se hliam vang bawkin bul a ṭan thei lo. 

Mahse, Belgian forward hi Borussia Monchengladbach lakah bench aṭanga luhtir a ni a, Huesca lakah bul ṭanin goal a khung nghal - a ke vei lam hmangin goal vei lam sirah mawi zetin a khung. October 5, 2019 hnua a vawi khat nan goal a khung ve leh ta!

Hazard-a'n goal hmahruai a khung a, a thunawn remtu chu Karim Benzema a ni. French striker hian minute 45-naah an goal hnihna a khung a, minute 45-naah Hazard nena inkawpin Valverde khung tur a siamsak zui. 

Minute 74-naah Ferreiro chuan Huesca beiseina siam turin goal khat khung ve leh mah se Real lakah an phur tak tak thei lo - minute 90-naah Benzema bawkin a khung leh a, 4-1 in Real an chak. 

Kum 32 mi ni ve tawh Benzema hian tun season-ah match kua khelin goal li a khung tawh a, assist vawi thum a nei tawh bawk - a la chuai lo. 

Real Madrid hian Champions League-a match hnih an khelh aṭangin point khat chiah an la nei a, La Liga-ah erawh match sarih an khelha an vawi nga chakna niin vawi khat chak loin vawi khat an khingpui an inhnehtawkpui - table chung ber an luah mek. 

Lionel Messi telna Barcelona-in Champions League-ah meuh Juventus chu harsatna nei loin 2-0 in an hneh a, La Liga-ah erawh team naran Alaves chu minute 62-naa Jota hnawhchhuah a ni chungin 1-1 bakin an thlah thei lo. 

Alaves tan hian Luis Rioja chuan minute 31-naah goal hmahruai a khung a, 1-0 a hma an hruai laiin Jota chu minute 62-naah a yellow card pahnihna a hmuh avangin hnawhchhuah a ni bawk. 

Barca-in a tam zawk an nih chhawr nghalin minute khat hnu lekah Griezmann chuan goal-a rawn khung nghal a, goal dang erawh an nei zui ta lo - Alaves keeper Fernando Pacheco a khel ṭha a, Ansu Fati, Lionel Messi, Miralem Pjanic leh Sergino Dest khung ngei tur nia lang chu a dansak vek. 

Griezmann chuan, "Point thum kan duh avangin result-ah kan lawm lo a, hmasawn thei kan ni. Chance kan hlah hnem a, a bik takin midang zawng aiin ka ka hlah hnem. Mahse, season ṭantir chauh a la ni a, kan la ṭha dawn chauh tih ka hria a ni," a ti. 

Atletico Madrid manager Diego Simeone-a'n Luis Suarez chu hahdamna hun pein 'risk' a la a, Osasuna lakah mikhual zawk an nichungin 3-1 in hnehna an chang tho.

Joao Felix chuan Atletico tan goal hnih a khung a, a goal hmasa zawk hi minute 43-naa penalty aṭanga a khung a ni - kum 20 mi forward hian penalty an hmuh vawi hnihna khung lo mah se minute 69-naah a tihsual thup nan a goal hnihna a khung. 

Osasuna beiseina siam turin Ante Budimir chuan minute 80-naah goal a rawn khung ve leh a, team ṭha zawk Atletico beng daih nan erawh a tawk lo. 

Arsenal aṭanga loan hmanga Atletico pantu Lucas Torreira chuan hun tawp nan minute hnih chauh a awm tawh tihah goal khat dang a khung a, hun a tawp meuh chuan 3-1 in Atletico an chak.