Nobby Stiles a thi

FIFA World Cup 1966-a England champion puitu Nobby Stiles chu kum 78 mi niin October 30, Zirtawpni khan a thi. 

Manchester United player hlui Stiles hi cancer leh rilru kim lohna avangin hun rei tak harsatna a tawk tawh. Stiles-a chhungte chuan, "Hun rei tak a damloh hnuah Nobby Stiles chu a chhungte awmpuina hnuaiah hahdam takin a thi," tiin thuchhuah an siam.

1966 World Cup final-a England tana West Germany laka bul ṭantu zingah Stiles hi thi pasarihna a ni a; captain Bobby Moore, Alan Ball, Ray Wilson, Gordon Banks, Martin Peters leh Jack Charlton ten chatuan ram an pan tawh bawk.

Final-a hattrick siamtu Sir Geoff Hurst chuan, "Nobby thih thu hian minti hnual hle. Rilru huaisen, team thahrui pawimawh a ni a, a awm lo tur hi channa nasa tak a ni," tiin Stiles a ui thu a sawi.

Stiles hian England tan match 28 a khel a, 1966 semifinal-a Portugal star Eusebio a dah ṭhat theih avangin fak a hlawh hle. English defensive midfielder hian Manchester United tan match 395 zet a khel a, league-ah vawi hnih a champion pui bakah European Cup-ah nomawi a chawipui bawk. Stiles hi May 18, 1942 khan Manchester-ah a piang a, kum 2000 khan chawimawina sang MBE pek a ni.