Champion tum Liverpool khelmualah Spurs
Premier League hmahruaitu Liverpool chu Pathianni zan dar 9:00-ah an inlan dawn a, an mikhual tur hi Tottenham Hotspur a nih avangin inkhel hmuhnawm beisei tur a ni.
Spurs hian February thla tir lamah kha chuan champion an la sawi ri a, mahse beisei loh result-in a zui avangin season thara Champions League khelh phak chu an tum a ni tawh. Spurs hnuaiah hian Arsenal, Manchester United leh Chelsea chu a sang pali zinga season khar inbeisei an la ni a, club lian tak vek an nih avangin a harsa dawn.
Zanin dar 6:00-ah Liverpool hnaih bertu Manchester City an inlan dawn bawk. City hian match khata khel tlem zawk chungin Reds hi point hnihin an phak lo mek a, champion inum boruak a ngaihnawm dawn chauh.
Klopp a phur
International break hman zawh a ni a, tunah chuan club player-ten hmun dangah an ngaihtuahna an sen a ṭul tawh lo. Hei hian Jurgen Klopp pawh a ti phur hle.
Liverpool boss chuan, "A phurawm khawp mai. Tunah chuan thil dangin min tibuai miah loin he hmun chiah hi kan ngaihtuah thei tawh ang. Game pakhat zawhah game dang atan kan inbuatsaih zel thei dawn a, match pawimawh tak tak an ni vek bawk," a ti.
Klopp chuan sawi zawmin, "Kan hmaa la ding turte hi a ṭhen chu Champions League khelh ngei tum an ni a, a ṭhen erawh inhamtan hram tumte an ni," tiin match tin chu a harsat vek tawh thu a sawi.
Liverpool hian Premier League match 31 an khelh tawhah vawi khat chiah an la tlawm a, zanina an inlanna tur Anfield-ah phei chuan Premier League match 36 chhung chu a zawnin an tlawm tawh lo - Spurs tan a harsa dawn.
Thawnthu ngaihnawm loh
Kum 2001-02 season khan Liverpool-in Premier League leh Champions League nomawi chawi an inbeisei a, hetih hunlaia manager Gerard Houllier chuan, "Ropuina ram thleng turin match 10 chiahin min dal ta," tiin a sawi hial.
Mahse, Champions League quarterfinal aṭangin an tla zui a, league-ah pahnihna an ni bawk - match thum chiah khelh an hmabak tawh tihin Spurs hian 2-0 in an hneh a, an nomawi beiseina a bo nghal. Kum tam liam hnuah Liverpool tan hun ṭha a inher chhuak a, Premier League leh Champions League nomawi chawi thei dinhmunah an ding mek - Reds beiseina ti tawp thei dinhmunah Spurs an ding leh ta bawk!
Klopp erawh a zam lo,"Kan inpeih em em a, tun hun lo thleng tur hi nghakhlel takin ka thlir a ni," a ti a, Anfield-a a team kaihhruai leh a chak tawh.
Dinhmun ṭha?
Euro Club Index-in Premier League nomawi chawi tura 56.6% nei ang hiala a chhut Reds hian tun season-a Big Six an hmachhawn vawi riatah point 13 an hlawh chhuak a, City laka vawi khat an tlawm tih loh kha chu point an hlawh chhuak vek.
Tottenham hi an huphurh thar thutin a rinawm lem lo a, international break duhawm tak hmangtu Sadio Mane, Mohamed Salah leh Roberto Firmino chet ṭhat erawh an mamawh - Mane hian a match hnuhnung 11-ah goal 11 a khung.
Reds player inhliam zingah Xherdan Shaqiri, Naby Keita leh Trent Alexander-Arnold chu inlan thei turin an dam hman a, Spurs tan Harry Winks leh Eric Dier dinhmun a la chiang lo. Tottenham hian league-a Liverpool an lenchilh hnuhnung 24-ah vawi khat chiah hnehna an chang a, thawnthu duhawm lo thaibo turin Harry Kane, Heung-min Son, Dele Alli leh Christian Eriksen an pawimawh ang.
Manchester khaw club
Manchester khaw club inthlau ṭhin tak City leh United dinhmun a inthlak thleng rih - City-in nomawi pali chawi beiseina an neih mek laiin United erawh palina nih phak ngei tumin Ole Gunnar Solskjær chu manager nghetah an ruat thung.
City hian tlai thei dinhmuna ding mek Fulham an hmachhawn dawn a, league champion an tum chuan tawlhthluk a thiang lo. League Cup-ah an champion tawh a, FA Cup-ah semifinal lut tawhin Champions League quarterfinal an lut tawh bawk a, inelna an telnaah beiseina an la nei vek - hei hian an ṭhat zia a hrilhfiah.
United-in Solskjaer ngheh hnua a match hmasa ber ni turin zanin dar 8:30 hian Watford an mikhual dawn thung a, pangana ni mek team tan chak ngei a ṭul - palina Arsenal chu point hnihin an phak lo mek a, Chelsea aiin point khatin an sang chauh bawk.
Solskjaer-a'n a ngheta hna pek a nih hnuah, "Tun aia rima kan thawh a ngai dawn a ni," a ti a, a sawi dik - vawi khat chetsuala season thara Europe-a inlan lo thei an ni.