Conor McGregor: A chawl tak tak em?

UFC fighter Conor McGregor-a'n rin loh takin a chawlh thu a puang thut a, khawvelin a lar vanglai taka Irish fighter a chawl hi a hrethiam thei lo.

Hei mai a ni lo - April 2016 pawh khan McGregor hian Mixed Martial Arts a chawlhsan thu a lo puang tawh a, mahse a chawlhsan tak tak lo tih chu a hnuah kan hria. Hetihlai hian McGregor hian UFC star lar a nihna chu hmachhuanin fight hmachhawn a duhte a thlen theihnan chawlh a puang chauh a ni zawk a, a hnuah Nate Diaz nen rematch a hlawhchhuah phah anga sawi theih a ni.

Kum 30 mi fighter hi khawvel fighter zinga 'deal' siam thiam ber pawla sawi a ni a, tun hnaia a thutlukna hian deal ṭha zawk a pe a nih pawhin a mak lo ang.

Engtin zel?
McGregor hian chawlh a puang chungin UFC-a kir leh thut thei a nih thu a zep hran lo a, tun dinhmunah chuan thlahna thu ziah chiam pawh thil harsa tak a ni rih.

Irish fighter hi Brazilian fighter Anderson Silva nena inhmachhawn tura thlem a ni a, Nate Diaz nen a vawi thum nana an intawn chungchang sawi rik a ni a, Max Holloway hming a ri tel bawk.

Hei chauh hi a ni lo. UFC 229-a a ngam loh tak Khabib Nurmagomedov hming lam rik ve reng a ni a, UFC lightweight champion hmachhawn nawn lo hian McGregor hian chawlh hlen a duh tak tak ang em, tih hi zawhna langsar a ni.

July-a UFC 239-ah McGregor hi Donald "Cowboy" Cerrone nena inhmachhawn tura sawi a awm hman a, mahse American fighter Cerrone hian co-main event a nih dawn avangin McGregor hian a duh lo niin a sawi.

Thlir zel ila
Thil awm dan leh tun hnaia fighter-te nena an inbiak dan thlir hian McGregor hian a duh ang tak fight a neih theih nan UFC neitute a nawr ni berin a lang a, mahse a beisei ang ngawt chuan thil a awlsam lo ang.

April 2016-a a chawlh thu puang a, deal ṭha zawk nena a lo kir laia UFC neitu kha chu Fertitta unau te an ni a, an 'star' lian ber hi awlsam taka chan mai an duh lo. Mahse, tunah chuan UFC hi sports PR leh management company Endeavor hnuaiah an awm tawh a, an hotupa ber Ari Emanuel hi inremna siampui har tak niin an sawi!

Chumi awmzia chu McGregor hma hun hi Ari Emanuel kutah thui takin an innghat tih hi a ni a, pound tluklehdingawn 3.2-a UFC leitute hian Irish fighter chan hi an ui a nih chuan sum tam zawk nen an thlem a ngai ngei ang.