Mumbai Indians-in Qualifier 1 khel dawn

Indian Premier League-ah Mumbai Indians chuan Inrinni zan khan Delhi Capitals wicket 9-in an hneh a, qualifier 1 an khel dawn tih a chiang. Round 13 khelh zawhah Mumbai chiah playoff khel turin an invaw tling a, Chennai Super Kings chiahin beisei tur an nei tawh lo. Team dang parukin hmun ruak pathum an inchuh a, November 3, Thawhlehni zanah engkim a chiang ang.

League round bika pakhatna dinhmun an luah theih nan Mumbai Indians-in Dubai International Cricket Stadium-ah Delhi Capitals an sawp. Mumbai-in vawm hmasak an thlang a, ṭum dang ang thoin India chhuanvawr Jasprit Bumrah a che ṭha lehpek hle.

Bumrah hian run 17 lek pein wicket thum a la a, Trent Boult-a'n wicket thum tho lain run 21 a pe bawk. Delhi hian run 110/9 chiah an siam a, run siam tam ber captain Shreyas Iyer pawhin run 25 chauh a siam.

Mumbai tan hna harsa tur a awm lo a, opener Ishan Kishan-a'n ball 47 lekah run 72 vaw chhuakin man of the match-ah thlan a ni. Indians hian over 14.2-ah run 111/1 siamin hnehna an chang.

Rajasthan Royals-in match tawp ber thlenga beiseina chhi nung turin match nga chhung chak zawn tawh Kings XI Punjab  chu wicket sarihin an hneh. 

Royals hian vawm hmasak an thlang a, Punjab tan Chris Gayle-a'n run 99 a siam bakah KL Rahul-a'n run 46 a siam bawk avangin run 185/4 an vaw chhuak a, target ṭha pangngai tak a ni. Rajasthan an che ṭha rual thung a, Ben Stokes (50), Sanju Samson (48), Steve Smith (31*), Robin Uthappa(30) leh Jos Buttler (22*) te hmangin ball 15 an dah bang a, run 186/3 siamin hnehna an chang.

Punjab leh Rajasthan te hian point 12 ve ve an hmu. Nimin tlai khan Kings XI Punjab-in beisei tur nei tawh lo Chennai Super Kings an hmachhawn dawn a, nizan khan Rajasthan Royals leh Kolkata Knight Riders te an inkhel bawk. Inkhel result hian playoff khel tur a hril ang.

Sunrisers Hyderabad-in Inrinni zan khan Royal Challengers Bangalore chu wicket ngain an hneh a, palinaah awmin playoff lut turin midang kutah an innghat lo.

Hyderabad-in vawm hmasak an thlang a, an bowler-te an che ṭha rual. Bangalore tan Josh Philippe (32) chiahin run 30 a vaw tling a, over 20-ah run 120/7 an siam. Hyderabad tan target harsa a ni lo a, over 14.1 lekah run 121/5 siamin hnehna an chang.

Sunrisers Hyderabad-in Thawh-lehni zanah Mumbai Indians an hmachhawn dawn a, Thawhṭanni zanah pahnihna Royal Challengers Bangalore leh pathumna Delhi Capitals te an inkhel dawn. IPL tawp lam boruak a sang hle.