NECS Cup champion Armed Veng
Nimin inkhel hmuhnawm takah Armed Vengin player 10-a khel Republic Veng chu extra time-ah 1-0 in an hneh a, veng leh khua inelna NECS Cup-ah an a vawi hnih nan an champion.
Republic Veng erawhin kum 14 hnuah a vawi khat nan veng leh khua inelnaah nomawi beisei mah se referee thutlukna vangin an thamral. Final inkhelah entu mipui an tam a, boruak a san avang leh floodlight hman a ṭul avangin inkhelh hunchhung hi darkar li zet a ni.
Fak phu Armed Veng
Armed Veng hi CYMA Football-ah vawi nga zet an champion tawh a, NECS Cup-ah ṭum khat an champion tawh chungin nomawi duhin an la tui hal reng a. Kawr eng, flag eng leh khuang nen Zomuanthanga Stand, Zohminga Zote leh tlang lamah an ṭhu a, champion an duh tih a hriat.
Tun inelna bikah erawh an khingpui an hraw hlawm avangin match hmasa bera awlsam taka an chak hnuah vanneihnain an chungah thla a zar a, final thlengin an vanneih a kaltluang. Chutihrualin vanneihna phenna 'talent' chu hmuh hmaih a thiang lo a, vengchhung inelna baka football club an din thar rah an seng.
Republic Vengin minute 23-na leka an player pawimawh ber F. Lalrinpuia an chan chungin a hneh lo zawkah an ṭang. Amaehrawhchu extra time-ah erawh player tam zawk danglamna a lang a, second half-ah Armed Veng hian inkhel thununin an chance ṭha neih hmasak ber chu minute 116-naah Lalmuanzova'n goal-ah a chantir a, chakna goal a ni zui bawk.
Hemi hnu hian Republic Vengin an nawr luatah Armed Veng hian goal chance ṭha an nei a, Lalfakzuala leh Muanzova ten goal ban pet per nan an hmang ve ve. Armed Veng coach Lalbiaksanga Colney chuan, "Kan vannei tak zet. Republic Veng kha an ṭang thei a, an khelh dan kha a chhuanawm ka ti a, ka tawrhpui hle a ni," tiin Vanglaini a hrilh.
Vanduai Republic Veng
Republic Vengin tawnhriat nei ṭha player leh rawlthar duhawm an kawl avangin champion an beisei a, veng mipuiin an thlawp ṭha a. Tun hnaia Lammual inkhel entu pung khawm tam ber ṭum a nih chhan hi nomawi duha tuihal Republic Veng mipui tihin a sawi theih.
Final hmuhnawm takah team pahnih an innawr tawn zak zak a, Republic Vengin chance ṭha bik an nei hmasa zawk a, Valpuia'n goal ngei tura ngaih chu goal zawnah a pet lo. Minute 23-naah Mizoram Police forward hi referee bula a ṭawngkam mawi lo vangin hnawhchhuah a ni a, hetichung hian Republic Vengin chance ṭha an ngah zawk.
A bik takin substitute F. Lallawmkima'n keeper chauh a hmachhawn hnua a hlah chu Republic Veng mipui mittui ti hnam tamtu mai a ni a, captain K. Lalnunzama leh Paul Ramfangzauva ten freekick aṭanga an hun ṭha neih chu an hmang ṭangkai thei lo. Republic Veng team-in player 10 a khel chungin an khel ṭha tluan a, an theihtawp an chhuah avangin inkhel entu mipui ngaihsan an hlawh ang.
Danglama thlentu Red Card
Final inkhel hmuhnawm tak chu referee thutluknain boruak a ti danglam. Republic Veng rinrawl Valpuia chu Armed Veng defender-in hnung lam aṭanga ball chhuhsak/tih tluk hnuah referee-in foul-ah a ngai lo a, Valpuia'n ṭawngkam mawi lo hmangin referee chuan ngaihtuah chiang loin red card a phawrh nghal.
FIFA Laws of the Game thlir chuan Law 12 'Fouls and misconduct' hnuaia point parukna 'anchhia lawhna ṭawngkam' tih hmangin red card pek theih a ni a. Referee thutlukna hi dan hnuaia pawm theih dan a awm a, chutihrualin dan hmang tho a yellow card pek theih dan a awm avangin thutlukna siamtu a malṭan a, red card phawrh tura hun a hmang rei lo lutuk chuan Republic Veng ṭantute rilru tihnat belhtu a ni.
