Higuain-a'n ram tana inkhelh chawlhsan

Chelsea striker Gonzalo Higuain chuan international football a chawlhsan thu a puang a, world champion vawi hnih ni tawh Argentina tan a inlan tawh dawn lo.

Kum 31 mi Higuain hian ram tan match 75 a khelh aṭangin goal 31 a khung a, khawvel striker hriam berte zinga mi ni ṭhin mah se 2018 World Cup hnu lamah ram tan khel tura koh a la ni leh lo a ni.

Juventus aṭanga Blues tana loan hmanga khel lai Higuain chuan, "Ram tan hian ka tih theih sang ber chu ka ti tawhin ka hria. Chhungkua a hun hman tam ka duh a, ka khelh mekna Chelsea tan inpek pumhlum ka duh bawk," tiin a chawlh thu a sawi a, Premier League chu inelna hautak a nih thu a sawi tel bawk.

Argentina tan Higuain-a'n inelna lian pathumah final a khel. Copa America-ah 2015 leh 2016 khan final an lut a, inelna ngaihhlut ber 2014 World Cup-ah pahnihna a nihpui bawk a ni.

Real Madrid, Napoli leh Juventus tan ṭha takin khel ṭhin mah se Higuain hi ram tana a inlanin sawisel a hlawh ṭhin. 2014 World Cup-a Germany nen an inkhelh ṭumin goal khung ngeina tur nia lang a hlah a, 2015 Copa America final-a hun pangngaiah penalty a hlah bakah, penalty shootout-ah a khung lo leh bawk - Chile an hneh loh chhan lian takah a ngaih theih.

Higuain chuan, "Mi ten ka goal khung loh an hre reng a ni mai thei, 2014 World Cup quarterfinal-a Belgium kan hnehna goal pawh kha an theihnghilh bik loh ka beisei. Sawiselna leh beihna hian mi thinlung a hliam thei a, chhungkua pawh a nghawng na hle. Mahse, ram tan hian ka theihtawp ka chhuah.

"Kan ram team hian kan tum ber kan thleng lo tih chu hriat a ni a, amaherawhchu kan hlawhchham tia sawi ngawt theih chu a ni bik lo ang," tiin nomawi chawi chiah lo mah se final vawi thum thlen chu sawi nep theih a nih bik loh thu a sawi.

Higuain hi a club nghet Juventus-ah a kir a rinawm tawh lo a, English club Chelsea hian season tawpah an lak ngheh ngei a rinawm. Blues tan chuan international a chawlhsan hi chanchin ṭha a ni thung ang. Maurizio Sarri naute hian Pathianni zan dar 6:35-ah Cardiff City an lenchilh dawn.