Federer-a'n nomawi hnaih zel

Miami Open vawi thum champion tawh Roger Federer chuan Kevin Anderson hnehin semifinal a inhlangkai a, tun hnaia rawlthar khel ṭha tak Denis Shapovalov nen final luh an inchuh leh ang.

Nimin zing inkhelah Federer hian hnehna chang turin hun a mamawh rei lo, darkar khat leh a chanve chhung lekin South African tlangval Anderson hi 6-0, 6-4 in a sawp.

Inkhel dangah Canadian player Shapovalov chuan Frances Tiafoe 6-7 (7-5), 6-4, 6-2 in a lo hneh ve bawk a, semifinal-a a hmachhawn tur Federer hi a mi ngaihsan a nih avangin, "Duhthusam a thleng dik," tiin Swiss star nen an inkhelh tur chungchang a sawi.

Hmeichhe inelna lamah Simona Halep chu Karolina Pliskova hmaah 7-5, 6-1 in a tlawm a, Romanian nula hian final a luh phak loh avangin WTA ranking chhuak tharah number 1 a ni phak dawn lo - Naomi Osaka chuan a chung ber dinhmun a luah chhunzawm ang.

Semifinal lehlemah Ashleigh Barty chuan Anett Kontaveit hnehin final a in hlangkai a, kum 22 mi Barty hian tennis a khelh hun chhunga a tawn san ber ṭum tawng tur hian 6-3, 6-3 in hnehna a chang a ni.