Mizoram Pachak hmawr bawkna

Zanin dar 8:00 hian Hawla Auditorium-ah Mizoram Pachak zawnna chu a hmawr bawkna neih tur a ni a, Zonet Rihnimah Live a ni ang.

Mizoram Powerlifting Association leh Zonet ṭangkawpin an buatsaih inelnaah hian item 12 an nei zo tawh a, champion lai P. Lalchamliana leh Ngurthanzauva Sailo te chuan point 176 ve ve hmuin table chung berah an awm - zanin hian thingtum inchar tam siak (log press) hmangin champion tur chinfel a ni dawn.

Inelnaah hian thingtum (80kg) chhuata awm chu nghawng zawn hma lamah lak kan tur a ni dawn a, lu chungah ban lehlam ve ve a ruala marin char kan tur a ni ang. Lu chunga char kan lai hian kaihza, kiu leh kawng a mar vek tur a ni a, ke pahnih a lei/chhuat rahna hi a che sawn tur a ni lo.

Pachak champion lai Chama chuan, "Ka hrilselna a ṭha a, sawilawk theih ni lo mah se theihtawp chhuahin inelna ka hmachhawn ang," tiin pakhatna nih leh ngei a tum thu Vanglaini a hrilh.

Lunglei pachak elphak mektu Ngura chuan, "Theihtawp ka chhuah ang," tiin Vanglaini hnenah pakhatna nih a tum thu a sawi ve bawk a, inelna hi a hmuhnawm dawn. Chama leh Ngura te hi an che fuh lo hlauh a nih chuan pathumna ni lai Abraham Lalṭhakima chu champion thei zingah a la tel bawk.