Indian Super League fixture a chhuak ta

India rama club football inelna sang ber Indian Super League chu November 20 aṭangin khelh ṭan a ni dawn a, match hmasa berah ATK Mohun Bagan leh Kerala Blasters chu GMC Stadium, Bambolim, Goa-ah an inkhel dawn. 

ISL-a a vawi khat nana inlan tur East Bengal chuan November 27-ah an match hmasa ber an khel ve dawn chauh a, Tilak Maidan stadium-a an inkhel turah hian 'Kolkata derby' khel nghalin Mohun Bagan an hmachhawn ang.

Covid-19 vangin ISL hi season dang angin home & away-a khelh a ni dawn lo a, Goa chuan inelna zawng zawng hi a thleng dawn.

Fixture hi round 11 atan chauh tihchhuah a la ni rih a, match 55 a awm phawt dawn tihna a ni - match 55 dang khelh tur chu December-ah tihchhuah chauh tur a ni ang. 

ISL fixture tihchhuah nghal vek a nih loh chhan hi Asian Football Confederation (AFC) lamin fixture an tihchhuah hun ngaihchan a nih vang a ni.

Season hmasa ISL league round-a hmahruaitu FC Goa chuan AFC Champions League an khel dawn a, ATK Mohun Bagan chuan AFC Cup an khel bawk ang.