Liverpool tan Champions League a hla tial tial
Premier League season ṭantira Manchester City nena inel ber tura ngaih Liverpool chuan season tharah Champions League pawh an khel thei lo mai thei - Newcastle United nen 1-1 in an inhnehtawk.
Inrinni zan khan Liverpool hian Anfield-ah Newcastle an mikhual a, Mohamed Salah chuan minute thumna lekah goal hmahruai a khung. Reds hian he goal hi an chakpui mai dawn niin a lang hman a, mahse, hun pek belh minute nganaah Joe Willock chuan Magpies si phurh a sut!
Merseyside club-in hnehna an chan zawh loh avangin table-ah parukna an ni a, palina Chelsea-in 1-0 a West Ham an hneh avangin Blues hi point liin an phak lo mek - match nga chiah khelh tur a awm tawh a, Reds dinhmun a chhe ta hle.
Liverpool coach Jurgen Klopp chuan, "Champions League khelh phu an awm a, zanin kan khelh dan ka en kha chuan kan phu lo a ni," tiin inkhelh zawhah a sawi - hei hian Liverpool dinhmun thui takin a hrilhfiah.
Beiseina
Anfield-ah Klopp-a'n chak loh a duh lo a, goal khung turin Sadio Mane, Salah, Roberto Firmino leh Diogo Jota-te inkhel bul a ṭantir vek - minute thumnaah a duh a hmu nghal.
Salah chuan tun season-a a league goal 20-na a khung a, Liverpool tana Premier League season thuma goal 20 khung tling thei hmasa ber a ni. Egyptian forward hian season hmasa (19 goals) tih lohah chuan 2017-18 (32), 2018-19 (22) leh tun season (20) ah te goal 20-a khung tling vek.
Liverpool-in goal an khung hma a, an beisei ang erawhin goal an khung zui lo - Mane, Salah, Firmino, Jota leh Trent Alexander-Arnold-ten chance an neih chhunzawm vek a, mahse, goal dang an khung thei lo.
Reds hian 69% ball chang chungin vawi 22 ngawt shot an nei a, target-ah vawi kua a kal thei. Mahse, Magpies keeper Martin Dubravka chet ṭhat zan an tawng a, Slovak keeper hian vawi riat zet save nei chungin a team a chhanhim.
A pawi zo ta
Magpies-in chance nei lo an ni bik lo. Mahse, Joelinton-a hun ṭha neih chu Alisson-a'n a dansak a, injury time-ah Callum Wilson-a khung chu handball vangin pawm a ni lo bawk.
Wilson-a goal pawmsak a nih loh hnuah Liverpool an thaw deuh huai a, mahse, rei a daih lo - Willock chuan match thum chhung a zawna goal-a khungna ni turin a pet goal a, hun a tawp zui.
Magpies-in point an hlawhchhuah avangin 18-na Fulham nena an inkarah point kua a awm ta a, tlak hlauhawm dinhmuna ding hman team hian season tharah Premier League an khelh chhunzawm ngei dawn niin a lang.
Liverpool erawh Anfield-a an chak zawh loh avangin an dinhmun ṭha lo sa a ṭhat loh belh a, May 2-ah Manchester United an lenchilh zui dawn bawk avangin kum 2019-a an champion-na Champions League-ah an inlan lo a nih pawhin a mak lo ang.
Match nga khelh tur kan la nei a, kan dinhmun tur chu kan hre thuai ang chu. Kan tihsualte inzir nan kan hmang thei lo a nih chuan Champions League kan khel lo mai ang. Club tenau zawk kan tumin sawi ngaihna awm lo khawpa tam chance kan nei ṭhin a, mahse, kan chhawr ngai lo. Dem tur an awm a nih chuan keimahni hi dem tur chu kan ni. Tun dinhmunah chuan hrehawm kan ti takzet a, hrehawm kan tih dan hi 150% a tling hial ang. Mahse, kan thawhleh theih dan tur ka ngaihtuah dawn a, tun dinhmunah erawh a harsa takzet a ni - result duhawm lo tak a ni a, mahse, kan pawm a ngai si a ni. - Jurgen Klopp, Liverpool manager