An ramah Djokovic a chak lo

Novak Djokovic-a'n clay court season a la hmang fuh hleithei lo. Serbia Open khelh laiah Djokovic hi Aslan Karatsev hneh loin semifinal a paltlang zo lo, inelna a hmachhawn hnuhnung pahnihah final a thleng ta lo.

Inrinni zan Centre Court-a inkhelah Russian tlangval Karatsev hian 7-5, 4-6, 6-4 in Djokovic hi a hneh a, nizan khan Aslan Karatsev nen final khel zui lehin, he thu buatsaih lai hian result kan hre hman lo thung.

Kar hmasa khan Monte Carlo Masters-ah Dan Evans hneh loin Djokovic chu a lo tla tawh bawk, inelna lian French Open khel turin inbuatsaihna a nei ṭha lo hle - Paris khawpuiah hlawhtlin a harsa dawn.

World number 1 Djokovic chuan, "Karatsev khan fak a phu, chak zawk tur dik takin hnehna a chang. Ka khelh danah ka lawm lo, kan khingpuite an khel ṭha viau a nih chuan keimahni lam inenfiah kan ngai a ni tlangpui.

"Point khat lek hmuh belh tur pawhin a hautak ka ti thei hle, ka chet chhiat chhan tak ka la hre lo. Tournament hi ka thlirkir ang a, ka ṭhat tawk lohna lai siamṭha turin theihtawp ka chhuah zui ang," tiin a sawi.

Clay court inelna lian leh ngaihhlut ber French Open hi May 24 aṭangin qualifier khelh a ni ang.