Chelsea chakna Timo Werner

Thomas Tuchel chuan West Ham an hneh hnuah Chelsea chu Real Madrid hmachhawn tura an inrintawk thu a sawi. Blues hian Inrinni zan inkhelah Timo Werner-a goal khat hmangin Hammers 1-0 in an hneh.

Tuchel naute hian palinaah an dinhmun an sawhnghet a, Thawhlehni zana Spanish club lian nen Champions League an khelh turah pawh beiseina an neih san phah dawn - inring tawk takin Estadio Alfredo Di Stefano an pan ang.

Goal khat a tawk
London Stadium-a inkhelah Chelsea lamin ball chang hnemin hun ṭha pawh an insiam hnem. Minute 43-naah Werner chuan mual laia a ball hmuh chu na takin a hauh a, a bula awm Christian Pulisic penin American player hian Ben Chilwell a pe chhawng.

Defender Chilwell-a'n box chhungah cross lut zeuhin ven loha awm Werner tan khung turin harsatna a awm lo. Germany forward hian Chelsea tan February thla hnu lama a goal khung lehna hmasa ber a ni a, chak nan a tawk.

Pound maktaduai 47 man Werner hian goal khung belh theihna remchang a nei, midfielder Mason Mount-a shot keeper in a lo dan per chu a chang hman a, mahse goal zawnah a pet lo - goal ban hrulah muangchangin uiawm takin a kal liam.

UCL beisei ngam West Ham a tawp lamah an zuih. Minute 81-naah Fabian Balbuena chu hnawhchhuah a ni, defender hi Chilwell laka a chet dan avangin an hrem. Referee Chris Kavanagh-a'n replay a en hnuah Paraguay international chet dan hi a hlauhawm tih hmuin red card a pe.

Tuchel a lawm
Manchester City hnehin FA Cup final an lut a, league lama anmahni elphak West Ham hnehin palina dinhmun an sawhnghet leh bawk. Chelsea manager Tuchel chuan a naute chungah rinna a nghat sang ta hle, striker Werner a lawmpui bawk.

Chelsea manager Tuchel chuan, "Kan goal khung tam takah hian Timo a inrawlh deuh zel, tun ṭumah pawh khan a tir aṭangin a khel ṭha hle a, a phu ang ngeiin goal pawh a khung. Tlarhma lam player chuan inrintawkna neih belh nan goal hi an mamawh," a ti.

Season hmasa khan Tuchel hian Paris Saint-Germain chu Champions League final a hruai thleng, French champion hian ban zui mah se kuminah English club enkawl chungin UCL final thlen theihna kawng a inhawng mek.

German manager Tuchel chuan, "Real Madrid nena inkhelh chu thil danglam tak a ni dawn. Anni hi tun hnai season 10 chhung chu Champions League-a team ṭha ber an ni. Team ṭha kan hmachhawn dawn lai taka inrintawkna kan nei thei hi a lawmawm," a ti.