Spurs-in Rodgers an duh?

Leicester City manager Brendan Rodgers chu Jose Mourinho thlak turin Tottenham lamin an duh nia sawi a ni. Spurs chairman Daniel Levy-a'n a thawhpuite chu Rodgers lakluh kawnga hmin a tum niin khawthlang media lamin an tarlang.

Rodgers kaihhruaina hnuaiah Foxes hian season duhawm an hmang mek. Premier League match 32 an khelh aṭangin point 59 an hmu a, an chungah hian hmahruaitu Manchester City leh Manchester United chiah an awm.

Mourinho an ban hnuah Spurs hian manager nghet an la nei lo, tun season chhung atan Ryan Mason chuan a enkawl lailawk dawn. London club hian inelna liana hlawhtlin an duh avangin manager hming langsar an zawng niin a lang.

Kum 48 mi Rodgers hian theihna sang tak a nei ngei a, inelna liana champion turin a ṭha tawk em, tih erawh thiltih hmangin a la fiah bik lo. Foxes hian FA Cup final-ah Chelsea an hmachhawn dawn, nomawi an chawi a nih chuan Rodgers hlutna a sang zual dawn.

Rodgers enkawl Leicester hian zanin dar 12:30 hian Premier League khel turin Crystal Palace an mikhual ang.