Punjab Kings leh Rajasthan Royals an chak

Indian Premier League-ah Zirtawpni zan khan Punjab Kings chuan wicket kuain champion lai Mumbai Indians an sawp a, Inrinni zan inkhelah Rajasthan Royals-in Kolkata Knight Riders wicket rukin an hneh ve bawk.

MA Chidambaram Stadium-a inkhelah Punjab Kings-in vawm hmasak an thlang a, Mumbai Indians-in run 131/6 chiah an siam a, run 63 siamtu Rohit Sharma-a'n thlawptu a hmu ṭha tawk lo. Punjab Kings tan opener Mayan Agarwal (25) thi mah se KL Rahul (60*) leh Chris Gayle (43*) ten thi loin hnehna an changpui a, Punjab hian over 17.4-ah run 132/1 siamin hnehna an chang.

Wankhede Stadiuma-ah Rajasthan Royals-in vawm hmasak an thlang. Knight Riders-in Rahul Tripathi (36), Dinesh Karthik (25) leh Nitish Raina (22) te hmangin run 133/9 an siam a, Rajasthan Royals-in opener-te che ṭha bik lo mah se Sanju Samson (42*) leh David Miller (24*) te hmangin over 18/5-ah run 134/4 siamin target hi an umpha a ni.

Zanin dar 7:30 hian Punjab Kings leh Knight Riders te hi Narendra Modi Stadium-ah an inkhel ang.