PSG chakna Kylian Mbappe

Kylian Mbappe hming sawi kan bang thei lo. French forward ṭha mi hian Metz lakah goal hnih khungin Paris St-Germain chu Ligue 1 hmahruaitu a nihpui, mahse inkhelh zawh hmain Mbappe hi hliam vanga lak chhuah a ngai.

April 29, Ningani maiah PSG hian Champions League semifinal khel turin Manchester City an tlawh dawn, player pawimawh Mbappe inhliam hi a dam hman lo a nih chuan channa lian tak a ni dawn.

PSG hian match 34 aṭanga point 72 hmuin table chung berah an awm, mahse nizan khan Lille leh Lyon an inhmachhawn a, vawi thum champion tawh Lille hi an chak a nih chuan a chung berah an inhlangkai leh ang.

Hei le Mbappe
Metz khelmuala inkhelah minute lina lekah Mbappe-a'n goal a khung ṭan a, chawlhlawk hnu lawkah Fabien Centonze hmangin mualneitu lamin si phurh an sut, a hnuah PSG tan Mbappe leh Mauro Icardi ten khung belhin nuamsa takin hnehna an chang.

France international Mbappe hian tun season Ligue 1 match 29 a khelh aṭangin goal 25 a khung a, ani aia khung hnem an awm lo. Season kal laiah PSG tan inelna hrang hrangah match 42 aṭangin goal 37 a khung tawh bawk.

Mauricio Pochettino naute hian league match khelh hmabak pali chiah an nei tawh, an champion leh thei a nih chuan tun hnai season kua chhunga vawi riat league title an lakna tur chiah a ni ang, nomawi chawi tur erawh chuan midang result an ngaihchan tel a ngai.

Lawm a kim lo
PSG tan Mbappe-a'n goal a khung a, an thiampuipa Neymar-a'n goal nei lo mah se a hmuhnawm. Midfielder Marco Verratti a lo kir leh tawh bawk avangin lawmna tur a tam, mahse hun tawp hma deuhin Mbappe chu malpui hliam vanga lakchhuah a ni.

PSG manager Pochettino chuan, "A hliam a nat lutuk loh hram kan beisei. Kan lak chhuah lai kha chuan Kylian kha na tak angin a lang lo, mahse eng emaw thilah inhliam nat theih a ni," tiin a forward chungchang a sawi a, a dinhmun tak erawh a la hre bik lo.

Nilaini zanah PSG hian Champions League semifinal first leg khel turin Manchester City an tlawh dawn. Etihad Stadium an pan hmain Mbappe a dam hman ngei an beisei. Champion lai Bayern Munich pet chhuaktu Paris club tan Mbappe hruai tel theih hi duhthusam a ni.