Sheffield a chak, Brighton an la him lo

Inrinni zan khan Premier League-a table mawng lama awm pahnih Sheffield United leh Brighton & Hove Albion te an inkhel a, season thara Championship khel tur Sheffield-in 1-0 in hnehna an chang.

Bramall Lane-a goal awmchhun hi minute 19-naa David McGoldrick-a khung a ni. English striker McGoldrick hian Ben Osborn-a cross chu vawi khatnaah khung thei lo mah se ball per chu a ke zawnah tla fuh leh hlauhin chiang zetin a khung.

Brighton-in Premier League-a inhamtan ngei tumin na takin an nawr a, Blades keeper Aaron Ramsdale a che ṭha tak zet a, Seagulls tlarhma a bil ve bawk. Brighton forward Neal Maupay-a'n first half-ah keeper chiah a hmachhawn hnua a khung loh bakah second half-ah six yard box chhung aṭangin a pet over.

Mikhual team an vanduai tel a, Jakub Moder-a siphurh sutna chu VAR hmanga ennawn a nih hnuah offside vangin pawm a ni lo. Brighton hian match 34 aṭangin point 34 an hmu a, relegation zone-a awm Fulham (27 pts) aia an tamna hi point sarih chauh a nih avangin la vanduai thei an ni.

Sheffield hian March thlaa manager Chris Wilder an ban hnuah hnehna an chang ve leh chauh. Chakna goal khungtu McGoldrick chuan, "Sheffield United tan kan khel a, relegate tawh mah ila kan club hmingṭhatna turin theihtawp kan chhuah zel dawn. Chutihrualin keimahni tan kan khel tel bawk," tiin khelh chhan an la neih thu a sawi.