Dortmund tan Haaland-a'n goal a khung

Borussia Dortmund-in Inrinni zan khan khualmualah Wolfsburg 2-0 in an hneh a, Erling Haaland-a'n goal hnih a khung. Inkhel dangah Bayer Leverkusen-in Eintracht Frankfurt 3-1 a an hneh ve bawk avangin Bundesliga-ah Champions League khelh inchuh boruak a 'hot' sawt.

Dortmund khingpui Wolfsburg hi Bundesliga-ah pathumnaah an awm mek a, point 57 an hmu. Amaherawhchu Haaland-a goal hnih hmanga panganaa awm Dortmund-in an hneh avangin an inkarah point hnih chauh a awm. Palinaa awm Frankfurt an chak loh bawk avangin Wolfsburg (57), Frankfurt (56) leh Dortmund (55) te inthlauhna hi point khat den den chauh a ni.

Dortmund hian DFB Pokal semifinal khelh tur an la nei a, Holstein Kiel nen (May 2) an inhmachhawn zawhah league-ah RB Leipzig, Mainz leh Bayer Leverkusen an hmachhawn dawn a, hmabak a harsa hle. Wolsburg pawhin RB Leipzig leh Mainz an la hmachhawn dawn a, hemi hma hian Union Berlin nen an inkhel phawt ang.

Eintracht Frankfurt fixture a thlanawm ber a, Mainz, Schalke leh SC Freiburg te a hmachhawn dawn. Chutihrualin Dortmund-in danglamna thlen thei striker Erling Haaland an kawl a, Norwegian striker hian match 26 aṭangin goal 25 a khung. Tun season Europe inelna sang panga zinga goal 25 khung theite chu Robert Lewandowski (36), Lionel Messi (25), Kylian Mbappe (25) leh Cristiano Ronaldo (25) te chauh an awm a ni.