Premier League khel turin Watford an tling

Watford chuan Inrinni zan khan Vicarage Road-ah Millwall 1-0 in an hneh a, Norwich City hnung zuiin season tharah Premier League an khel dawn. Goal awmchhun hi minute 11-naah Ismaila Saar-a'n penalty aṭanga a khung a ni.

Championship aṭangin a sang pahnih Premier League khel turin an tling nghal a, Norwich City leh Watford te hi pathumna Brentford-in an umpha thei tawh lo. Hmun ruak pakhat hi playoff hmangin pathumna aṭanga paruknaten an zawng dawn. Tun dinhmuna playoff khel thei china awmte chu Brentford, Bournemouth, Barnsley leh Swansea te an ni.

Club ngai bawk!
Liverpool-in chiang taka Premier League nomawi an chawi kum, season liam ta kan thlir kir chuan Premier League aṭangin Bournemouth, Watford leh Norwich City te an relegate. Championship champion ve meuh Norwich chuan point 21 chauh an hmu thei a, Bournemouth leh Watford ten point 34 ve ve hmuin an relegate chiah chiah bawk.

Championship-ah erawh Premier League a tla thla hlim te hi an che ṭha hle. Norwich City hian Inrinni zan khan QPR 3-1 in an hneh a, season thum chhunga vawi hnih ngawt Championship-a champion turin an dinhmun a ṭha hle.

Watford tan champion a harsa tawh dawn a, chutihrualin season tharah English football inelna sang ber an khel dawn. Premier League club tana Champions League khelh hlutna aiin Champonship club tana Premier League khel tura inpettlin hlutna hi a sang zawk.

Premier League aṭanga relegate dang Bournemouth pawh an elpui Brentford lakah 1-0 in chak zo lo mah se playoff khelh tur an la nei a, Norwich leh Watford hnung zui turin kawng a la inhawng.

Fak phu Xisco
Watford-in Vladimir Ivic hoin season bul an ṭan a, beisei anga result ṭha an neih loh avangin December 19 khan Ivic hi banin kum 40 mi Francisco Javier Munoz chu an lalut. Xisco tia an koh Spanish manager hi kum khat lek chhunga Watford manager pangana a ni.

Xisco hnuaiah khingpuite draw ngun tak Watford chu hnehna a chanpui chho a, keeper Daniel Bachmann chu first keeper-ah dah chhoin Francisco Sierralta, William Troost-Ekong leh Kiko Femenia te hoa tlarhnung khawng ṭha sa chu a tih khawng belh.

Manager thar hnuaiah tlarhma a hriam hret a, Manchester United nen pawha sawi zawm tawh Sarr-a'n hmun pawimawh changin Brazilian rawlthar Joao Pedro leh Sweden winger Ken Sema te goal nawr kawngah an ṭangkai bawk.

Watford head coach Xisco Munoz chuan, "Hun hlimawm danglam tak a ni. Tun hun hi lawmthu sawi hun a ni a, min thlawptu zawng zawng chungah lawmthu ka sawi a, a bik takin player-te chungah ka lawm. Ka naute an khel ṭha thei em em a, level sang takah kan awm," tiin a sawi.

Derby an him lo
Championship-ah match hnih chauh khelh tur a awm tawh a, Wayne Rooney enkawl Derby County chuan an mualah Birmingham an hneh loh avangin tla thei dinhmunah an la ding. Rams hian Colin Kazim-Richards hmangin goal khung hmasa mah se Lukas Jutkiewicz hmangin Birmingham-in an lehthal.

Derby hian paruknaa awm Swansea City an la hmachhawn dawn bakah relegate thei dinhmuna ding Sheffield Wednesday an la hmachhawn dawn avangin hmabak a la harsa dawn hle. Rooney hote hi match nga chhung an chak lo zawn tawh a ni.