UFC 261 - Kamara Usman hmaah Masvidal a zal!

Jacksonville khawpuia mipui 15,000 pungkhawm hmaah Jorge Masvidal a tlu a, Kamara Usman kuttum a tawn vang a ni - UFC 261 a hmuhnawm takzet.

Nimin zing khan Kamaru Usman chuan a zawna a vawi li nan UFC Welterweight Championship kawng-hren a kawl lai chu a humhim leh ta a, round hnihna lekah fighter rothap Jorge Masvidal chu a tuk zal. Nigerian fighter Usman chuan, "Mi zawng zawng bulah ka sawi tawh, a ni telin ka ṭha zel a, MMA-a ka tel chhung chu ka tan sang lua a awm lo," a ti zui.

Usman chuan sawi zawmin, "Khawvela pound-for-pound fighter ṭha ber ka ni," a ti a, kum 33 mi fighter thusawi hi ngaihthlak nuam ti lo fe fe an tam ang.

A hming Usman
July, 2020 khan Usman leh Masvidal hi an lo intawng tawh a, kum 36 mi Masvidal hian ni ruk bak inbuatsaihna a nei lo - heti chung hian fight hmuhnawm tak a pho chhuak a, unanimous decision hmangin a tlawm.

Masvidal hian inbuat-saihna hun ngah zawk se Usman-a hneh tur thu a sawi a, Usman hian a hma aia nasa zawka a hneh tur thu a sawi thung - fighter pahnih duh ang ngeiin an intawng leh ta a, Usman-a thusawi a thleng dik ta zawk.

Round khatna aṭangin fighter pahnih an inhlau lo tawn a, a hmuhnawm hle. Round hnihnaah thawnthu ziah danglamin a awm nghal a, Usman-a'n a kut dinglam hmangin na zetin Masvidal-a deng fuh a, a tho leh tawh lo - Usman a chak.

Vawi 50 fight-a hmachhawna vawi 35 chaka, a vawi 15-nana tlawm Masvidal chuan, "Ka chhung, ka ṭhiante leh min ṭantu hmaah, ka career-a a vawi khat nan knockout ka ni a, na ka ti. Ka rin loh dan takin a rawn khel a, sawi theih ka nei lo. Fair takin a chak a, Pathianin malsawm rawh se," tiin a khingpui a fak.

Fight dang
UFC 261-a fight ngaihven hlawh dangah Rose Namajunas chuan round khatna lekah Zhang Weili a hneh a, Chinese fighter-in UFC Women's Strawweight title-a kawl lai chu a chhuhsak.

Women's flyweight champion Valentina Shevchenko chuan a zawna a vawi nga nan a title-a humhim leh ta a, amah hneh thei ber tura ngaih Jessica Andrade chu round hnihna lekah technical knockout (elbows) hmangin a hneh.

UFC middleweight champion hlui Chris Weidman-a'n Uriah Hall hneha a career uaithla tawh humhim a tumna chu a hlawhchham a, kum 36 mi fighter hian second 17-na leka Hall-a petna lamah a ke a ti tliak a, tko hmangin a tlawm.

Anthony Smith leh Jimmy Crute inhnek chu Crute-a ke hliam vangin doctor-in khelh zui chiah a ngai lo a, Smith hi chakah puan a ni bawk.