United ṭantuten Glazer chhungkua an dodal

Inrinni khan Old Trafford kawtah Man-chester United ṭantu mi za chuang an pungkhawm a, European Super League-a club neitu Glazer chhungkua an tel avanga an lungawi lohna an lantir a, club chhuahsan turin an ngen.

Man United hma hian Chelsea leh Arsenal ṭantute chuan club neitu Roman Abramovich leh Stan Kroenke te chunga an lungawi lohna an lantir tawh a ni.

United ṭantute hian kar liam ta Ningani khan club training-na hmun Carrington-ah kalin, banner pahnih 'Glazers Out' leh '51% MUFC' tih chu an pholang.

ESL aṭanga Man United an inhnuhdawh hma khan club co-chairman Joel Glazer chu inelna tharah hian vice chairman tur a ni a, hei hi United ṭantute lungawi lohna belchhahtu a ni.

Joel Glazer hian kar liam ta Nilaini khan an tihsual avanga ngaihdam dilna a ti chhuak a, amaherawhchu Inrinnia thil thleng hian an la ngaidam lo tih a pholang. Man United hian nizan khan Elland Road-ah Leeds United an hmachhawn a, result kan hre hman lo.