Mainz-in Bayern champion lawm hun an sawn

Inrinni zan Bundesliga inkhelah Bayern Munich-in Mainz hneh se champion an lawm thei tur a ni a, amaherawhchu Caface Arena-ah table-a 12-naa awm Mainz-in 2-1 a hnehna an chan avangin Bavarians an an la champion lo.

Mainz tan Jonathan Burkadt chuan minute thumna lekah a khung a, box pawn chiah aṭanga kawh taka a pet chu keeper Manuel Neuer zawnah kal mah se Bayern captain a chesual. Mualneitu hian minute 37-naah an khung belh a, Phillipp Mwene freekick pet chu Swedish midfielder Robin Quaison-a'n a tauh goal.

First half-ah mak takin Mainz-in 2-0 in hma an hruai a, a mak lehzualna chu Bayern hi an kim ṭha hle. Goal khung khawl Robert Lewandowski pawhin bul a ṭan a, amaherawhchu goal venhim hna bera Mainz tlarhnung paltlang an harsat.

Injury time-ah Alexander Hack a chesual a, an lama tauh let chu Lewandowski zawnah tak tlain Polish striker hian 'cool ' taka ball kang a lak thlak hnuin rilru fim takin goal-ah a chantir. Bayern tan goal dang khungna hun a awm tawh lo a, Mainz-in 2-1 in hnehna an chang.

Kum 32 mi Lewy tan erawh goal hlu tak tiin a sawi theih. Polish striker hian tun season Bundesliga bikah goal 36 a khung tawh a, match thum khelh tur la awmah goal li dang a khung theih chuan club legend Gerd Muller-a record a nihrual thei dawn.

Bayern Munich manager Hansi Flick chuan, "Team tin hian khelh ṭhat ṭum an nei vek a, tun ṭum ang hi chu thil thleng thei reng a ni. Chutihrualin kan goal bawh a na lo a, goal hmaah kan hlauhawm lo. Thil chiang tak erawh ka naute an chau ve a, an dinhmun ka hriatthiampui hle," tiin a sawi.

Bavarians hian Borussia Moncheng-ladbach (May 8), SC Freiburg (May 15) leh Augsburg (May 22) te an la hmachhawn dawn a, Mainz laka point an hmuh loh avangin an mual Allianz Arena ngeiah champion an nemnghet thei dawn niin a lang.