Milan tan fimkhur a ngai

Sassuolo laka an tlawm avangin AC Milan tan Serie A nomawi a hla sawt a, zanin dar 12:15-a Lazio nen an inkhelh hunah an chesual leh a nih chuan league title beiseina a tawp anga sawi theih a ni ang.

Milan coach Stefano Pioli-a'n hliam dam tawh ṭhenkhat a chhawr thei dawn a, lawmna tur a ni. Mahse, player panga - Hakan Calhanoglu, Samu Castillejo, Diogo Dalot, Ante Rebic, Alexis Saelemaekers leh Theo Hernandez te chu yellow card an hmu leh a nih chuan hrem mai theih an ni.

Lazio hnuah hian Benevento leh Juventus an hmachhawn zui leh dawn, player pawimawh an mamawh zual lai tak an tawng chho mek. Hrem vanga chawl Zlatan Ibrahimovic chu match khat dang a chawlh a la ngai bawk.

Pioli chuan, "Hliam leh hremna hi chu football ken tel a ni, harsatna karah pawh a khel thei ten theihtawp kan chhuah zel a pawimawh. Season a la tawp lo a, match hnuhnung ber kan khelh zawh hma chuan tha thlah a thiang lo," a ti.