Real-in goal an khung lo - nomawi a nghing!

Spanish La Liga nomawi inchuh boruak a 'hot' vanglai takin Real Madrid-in goal an khung thei lo a, Inrinni zan khan an mikhual Real Betis nen 0-0 in an inhnehtawk.

Real-in table-ah pahnihna dinhmun an luah chhunzawm a, point hnihin hmahruaitu Atletico Madrid an thlau - Diego Simeone naute hi nizan khan an inlan a, he thu buatsaih a nih lai hian result kan hre hman lo. Nizan veka inlan Barcelona-in hnehna an chan chuan Real an nihrual dawn a, match khatin an khel tlem bawk - Sevilla an inkhel bawk a, an result hi kan hre hman lo vek.

Sevilla pawh hian hnehna an chan chuan Real nen point khat chauhin an inthlau dawn tihna a ni a, Zinedine Zidane leh a naute tan La Liga nomawi humhim a harsa zual ta sawt.

0-0
Inkhel ṭantir lamah team pahnih an che hleithei lo a, second half-ah inkhela chance ṭha sawi tur chu a thleng ve chauh - Rodrygo chuan a cross-shot hmangin bar a tih per a, Betis thin phu a rang.

Real keeper ṭha mi Thibaut Courtois chu fak phu a ni a, Guido Rodriguez leh Borja Iglesias-te khung tur nia lang chu Belgian keeper hian a dansak ve ve.

Hun tawp nan minute 15-a la awm tihin Vinicius Junior-a'n ball a tlan luhpui a, pek remchang takin Karim Benzema lo insiam rem mah se, shot-a thlang a, a tifuh lo. Madrid khaw club hian penalty hmuh an inbeisei bawk a, Betis defender Juan Miranda-a'n Eder Militao ball tauh chu a kutin a khawih fuh ngei niin a lang. Mahse, referee-in penalty pekna turah a ngai lo a, Real an vanduai.

Hazard-a lo kir
March 13 hnua a vawi khat nan Eden Hazard-a inkhel ve leh ta a, hliamin a tih buai ngun ve tak forward hian tun season La Liga-a match 10-a khelh vena chiah a ni!

January 30 hnua Real tana inkhel bul la ṭan leh lo Hazard hi minute 77-naah luhtir a ni a, Belgian forward hi player thiam bik a nihna hmuh tur awm zauh ṭhin mah se danglamna erawh a keng tel lo. Kum 30 mi forward hian tun season inelna hrang hrangah match 15 chiah a la khel a, goal thum a khung tawh - Real-a pan hnuah match 37 khelin goal li a khung a, assist vawi sarih a nei.

Pound maktaduai 150 thlenga a man sang chho thei tur forward hian a man ang zatin a la khel chhuak lo hle - league nomawi inchuh boruak 'hot' vanglai taka a lo kir thei erawh Real tan lawmna a ni.

A tawp thlengin...
Real an tawlhthluk leh tak avangin an nomawi beiseina a nghingah ngaih a ni a, mahse, Zinedine Zidane erawh a beidawng ve lo - inelna a la tawp loh thu a sawi.

Real coach chuan, "Match nga khelh tur a la awm a, match nga chu tam tak a ni. Point hnih kan hloh a, mahse, a tawp thlengin kan bei ang," a ti a, Betis laka chak zawh loh avanga beidawn a tum lo.

Zidane chuan inkhel thlirkir zuiin, "Tlarhnungah kan khel ṭha a, mahse, tlarhma lamah kan tih tur kan ti tawk lo a ni. League erawh a la tawp lo a, midang pawh an la inkhel ve dawn," a ti a, an elpuite chu chesual ve thei tho an nih thu a sawi.

Real hian Thawhlehni zan dar 12:30-ah Champions League semifinal first leg khel turin Chelsea an mikhual dawn a, Betis laka chhawr loh Ferland Mendy leh Toni Kroos chu Chelsea laka chhawr an tum thu Zidane chuan a sawi lang.