Milan khawpuiah Ibra

Zlatan Ibrahimovic chuan AC Milan tan a khel leh ta. Swedish striker hi bench aṭanga dah luh niin Sampdoria lakah erawh an mamawh goal a khung nghal thei bik lo, goal nei turin match dang a nghah leh rih a ngai dawn.

Kum 38 mi Ibrahimovic hian 2010-11 season khan Milan hi Serie A nomawi a chawipui a, club hrang hranga a khelh kual hnuah thla ruk chhung atan Milan khawpuiah a kir leh. Sampdoria lakah hian Krzysztof Piatek thlakin minute 55-naah khelmual a rawn lut a ni.

Manchester United tan pawha khel tawh Ibra hian goal khung theihna hun ṭha vawi hnih a nei, a hmasa zawk chu goal line aṭanga an pet chhuahsak bakah mikhual keeper Emil Audero a paltlang zo lo bawk.

San Siro-a inkhelah hian Milan an vannei. Southampton striker Manolo Gabbiadini chuan goalkeeper Gianluigi Donnarumma a paltlang tawh hnuah goal zawnah a pet lo a, a vanduai ṭum ni lo se la chuan Sampdoria lamin point thum an hawn thei ang.

Ibra hian Milan bakah Inter Milan leh Juventus tan khel tawhin Serie A goal 122 a khung tawh, a kum tam deuh tawh mah se a la fit ṭha; Italian football inelna sang berah hian goal a khung belh leh ngei pawh a rinawm.