Wembley Stadium-a entu 8,000 hmaah Spurs hnehin Man City an champion

Pathianni zan Carabao Cup final-ah Manchester City-in Tottenham Hotspur 1-0 a hnehin an champion a, goal awmchhun minute 82-naa Aymeric Laporte-a tauh luh a ni. Pep Guardiola hoten League Cup nomawi a zawna ṭum li an chawina a ni a, Manchester City vawi riat champion-na chiah ni bawkin Liverpool record an nihrual.

Tun ṭum final danglamna pakhat chu coronavirus vanga buaina a thlen hnua English football-a entu tam ber ṭum a ni a, mi 8,000-in Wembley Stadium-ah inkhel an en avangin boruak a nun phah hle.

Dream final
Carabao Cup final khel tur hi January thlatirah a hriat tawh a, Jose Mourinho enkawl Tottenham Hotspur leh Guardiola kaihhruai Manchester City an inkhelh dawn avangin 'dream final' tih theih a ni. Manager ṭha pahnih hi Real Madrid leh Barcelona an enkawl lai aṭanga an inhal tawh avangin final hi en a châkawm hle.

Pep hian sum ngah zawk Man City a enkawl a, player a neih ṭhat zawk bakah League Cup final a nih bawk avangin a buk a rit zawk. Chutihrualin Mourinho hian Harry Kane, Son Heung-min leh Gareth Bale te a neih ve tho avangin Spurs hi dah hniam theih a ni bik lo.

Amaherawhchu final khelh hma ni ruk chiah a awm tawh tihah Spurs-in nomawi chawi thiam bik Mourinho an ban a, dream final anga ngaih theih chu final satliah a ni tawh. Tottenham-in tun ṭum hmaa League Cup final an thlen hnuhnun ber chu kum 2015 kha a ni a, hemi ṭum hian tun ṭuma manager Ryan Mason hian bul a ṭan a, Mourinho erawh Chelsea champion puitu manager a ni thung.

Final chu
League Cup hi inelna liana chhiar zinga an ngaihhlut loh ber a ni a, chutihrualin final chinah hi chuan chak ngei duhin manager-te'n player an rem ṭhin. Tun ṭum final pawh a danglam lo, Guardiola-a'n round hmasa lama luhtir keeper Zack Steffen chhawr bawk mah se player dang zawng chu a neih ṭhat ber ber an ni.

Tlarhmaah tun laia che ṭha em em Phil Foden thlawp turin inhliam dam hlim Kevin De Bruyne a dah lut nghal a, nomawi chawi a tum bakah Champions League semifinal khelh hmabak an neih avangin minute 90 chhunga chinfel ngei a tum niin a lang.

Ryan Mason pawhin sa huai a rawn ser a, Kane-a'n bul a ṭan a, Bale erawh bench-ah a awm. Real Madrid aṭanga an hawh Bale hian tun hma a phak tawh loh avangin bench-a a awm hi thil mak a ni lo.

Football Inzirtir
Ṭan phat aṭangin Man City an chungnung zawk a, goal chance pawh Raheem Sterling hmangin an ngah nghal. Tun hnaia che ṭha tawk lo Sterling-a goal hmaah a vanduai a, Eric Dier-a'n a goal khung ngei tur a dansak. City-in chance ṭha an nei chhunzawm a, De Bruyne cross chu Toby Alderweireld-a'n Sterling a zawn a thlen hmain a dang hman a, a per chu Foden-a'n goal-ah pet nghal mah se Alderweireld bawkin a khawih hman avangin goal ban a per a, a goal lo.

Riyad Mahrez pawhin mual vei lam aṭanga lalutin a ke dinglamin a pet a, goal pawnah chiah a kal. Joao Cancelo-a'n box pawn aṭanga a pet pawh keeper Hugo Lloris-a'n a dang ṭha hle.

Spurs hi Ryan Mason-a enkawl ni mah se Mourinho enkawl ni awm fahranin goal venhim chu hna berah an nei a, counter attack hmanga vuak letna hun ṭha nei bawk mah se a pawimawh laiah an tihsual leh ṭhin avangin City keeper Zack Steffen an tibuai pha lo.

Man City-in second half thunun zui mah se goal hmuh tur a awm lawk lo a, Guardiola-a'n bench aṭangin player a luhtir ngam lo. Mason zawkin game sawi danglam tumin bench aṭangin Bale leh Moussa Sissoko te a luhtir a, inkhelah erawh City bawk an chungnung.

Spurs-in tlarhnung rem phui ṭha viau mah se hun tawp lamah vawi hnih an tisual nawn. Serge Aurier-a'n ṭul lo takin Sterling a tlawh thluk avangin freekick a chawi. City midfielder De Bruyne-a'n freekick hi petin Aymeric Laporte-a'n a tauh goal.

Minute 82-naa French defender goal khung hi goal ṭha ni mah se Spurs midfielder Sissoko-a'n duh thala a zuantir avanga lut a ni a, team ṭha lo zawk Spurs-in set piece aṭanga goal an chhuah hi manager naupang Mason-a'n inzir a mamawhna chiah a ni.

Man City-in goal an neih an hnuah pawh an nawr chhunzawm a, Spurs-in tih ngaihna vak an hre lo. Tottenham-in si phurh sutna hun ṭha an nei lo a, goal dang an chhuah belh loh avangin an vanneiah a ngaih theih zawk.

Eng nge an sawi?
Hamrik hnuhnung a ri a, Spurs player pawimawh Son Heung-min chu insum pawh tum loin a ṭap nghal. Ryan Mason chuan, "An thil tawn hi ka hriatthiampui. Final-ah a chak lo zawkah ka ṭang tawh a, chak loh hi a na a ni. Champion tumin kan theihna zawng zawngin kan khel a, ka naute an khelh dan ka chhuang hle," tiin a sawi.

Man City manager Pep Guardiola chuan, "Kan khel ṭha em em a, kan theihna sang tak hmuhin a awm. Kan rilruah Champions League chu a awm reng a, chutichung chuan ṭha takin kan khel chhuak. Kum li a zawna Carabao Cup-a champion chu a ropui hle. Nomawi chawi tur hian Arsenal leh Manchester United te kan hneh a, champion hi kan phu a ni. Chutihrualin nomawi ringawt hi a ni lo a, ka naute hian hmabak êng tak an nei bawk," tiin a sawi.

A CHHEHVEL

Entu 8,000 : FA Cup semifinal-a Leicester City-in Southampton an hneh ṭum khan mi 4,000 in inkhel an en a, League Cup final hi mi 8,000 in an en thung. Finalist Man City leh Spurs te hian entu 2,000 ve ve an thawh a, a dang zawng hi Covid-19 dona kawnga hnathawktu National Health Service (NHS) leh stadium chhehvela cheng te an ni. Chutihrualin kum 18 naupang, rai puar leh natna benvawn neite erawh inkhel en hi an remtihsak lo thung.

League Cup Specialist : Man City hian kum li chhung a zawnin League Cup nomawi an chawi tawh a, Phil Foden-a'n professional career a ṭan hnuah League Cup-ah hneh loh a la tawng lo. Man City hian League Cup hnuhnung pariatah vawi ruk an champion a, a kara tlazep chu Jose Mourinho enkawl Chelsea leh Manchester United te chauh an ni. City hian League Cup nomawi vawi riat an chawi tawh a, Liverpool nen an champion zat a inang chiah.

Nomawi paruk : Man City forward Sergio Aguero leh final-a captain Fernandinho ten League Cup nomawi vawi ruk ve ve an chawi tawh. Man City hmabak : Manchester City hian April 28, Nilaini zanah Paris-ah nikum UCL finalist Paris Saint-Germain nen semifinal first leg an khel dawn. Champions League hi Pep Guardiola-a'n a ngaih pawimawh ber a ni. City hian May 1, Inrinni zanah Crystal Palace an hmachhawn leh ang a, hnehna an chang a, an hmelma Manchester United-in Pathianni zana Liverpool an hneh loh bawk chuan Premier League-ah an champion ang.

Spurs hmabak : Tottenham hian Premier League-ah point 53 hmuin pasarihnaah an awm mek a, palinaah awm Chelsea (58 pts) point ngain an pha lo. Spurs hian Sheffield United, Leeds United, Wolves, Aston Villa leh Leicester City te an la hmachhawn ang.