Real khelmualah Chelsea an leng dawn

European Super League boruak a dai a, tualchhung league match an khel zo a, Champions League lam hawi a hun leh ta - zaninah inkhel hmuhnawm en tur kan nei nghal dawn.

Real Madrid chuan Champions League semifinal first leg khel turin Chelsea chu zanin dar 12:30-ah an mikhual dawn a, inkhel a hmuhnawm loh ring suh. Chelsea boss Thomas Tuchel chuan, "Kan naupan lai aṭanga ka duhthusam ṭhin chu hetiang ang inelna sanga Real Madrid hmachhawn hi a ni," a ti a, huphurhna aia phurna a san zawk thu a sawi.

Real Madrid-in league lamah an beisei ang result an neih theih loh avangin an nomawi beiseina a nghin lai tak a ni a, Chelsea erawh Tuchel-a awm hnuah top four-a an dinhmun an sawhngheh leh tak avangin an phur vanglai tak a ni thung.

Chelsea an dam ṭha
Premier League club-in hliam vangin Mateo Kovacic an chhawr thei dawn lo tih loh chu player inhliam an nei lo a, an ṭhat dan berin Spanish champion an lenchilh thei dawn tihna a ni.

Tuchel-a'n a hman thiamsa 3-4-2-1 bawk a hmang leh ngeiin a rinawm a, Edouard Mendy-a'n si ban nghakin a hmaah captain César Azpilicueta, tawnhriat nei ṭha Thiago Silva leh Antonio Rudiger an awm thei ang. Midfield laia Jorginho leh N'Golo Kante an inkawp theih chuan Real tan Casemiro, Toni Kroos leh Luka Modric chhuan viau bik a fuh lo mai thei - a hmuhnawm dawn.

Tlarhma hi Chelsea chak lohna a ni a, Timo Werner, Kai Havertz leh Mason Mount-te hi Real tlarhnung su hawng tura rin an harsa - Real hian hliam vangin captain Sergio Ramos chhawr thei dawn lo mah se Dani Carvajal, Raphael Varane, Eder Militao leh Nacho-te an din tlartir thei dawn.

Real an ṭha zawk?
Lehkha aṭanga en mai chuan Real hi an ṭha zawk niin a lang a, tawnhriat pawh an nei ṭha zawk - mahse, tlarhma lamah Karim Benzema tih loh hi sawi vul chuk tur an nei meuh lo a, chak an duh chuan Vinícius Júnior leh Marco Asensio-ten French striker hi an thlawp ṭhat a ṭul ang.

Team ṭha zawka ngaih Real hian Ramos bakah Lucas Vazquez (khup) leh Ferland Mendy (chawn) chu hliam vangin an chhawr thei dawn lo a, inelna hrang hranga an match hnuhnung paliah goal khungna match khat chiah (vs Cadiz; 3-0) an neih avangin rin an harsa.

Mahse, Zinedine Zidane-a enkawl team hi rin loh lai taka rawn che ṭha ṭhin team kha an ni tih theihnghilh loh a ṭha - quarterfinal-a Liverpool nen an intawn dawn khan La Liga lama an result nen rin an hlawh lo zawk. Mahse, he team hian a thiam pariat zing aṭangin Premier League champion an pet chhuak a, El Clasico-ah Barcelona an hneh zui - Blues hian tun hnai an result hmanga an teh chuan an tisual ang.

Hei le Blues
Blues hian Champions League quarterfinal aṭanga FC Porto an hnawhchhuah hnuah FA Cup final lut turin Manchester City an hneh leh a, an inrintawk leh phur vanglai tak a ni.

Tun hma angin player malkhaia sawi vul chuk tur nei lo mah se coach 'Tuchel' an nei hi huphurhna tham an tling a, German coach enkawlna hnuaia match 21 an khelhah vawi hnih chiah an la tlawm tih hriat a ṭha. Tuchel chuan, "Zidane hian Champions League-ah a zawnin nomawi vawi thum a chawi thei a, thil tih theih loh ang deuhthaw a nih avangin record ropui tak a ni. Kan tum tur hi Real an ni a, a harsa dawn.

"Mahse, inrintawkna sang tak nei chungin kan kal dawn a ni," a ti a, Real chu team ṭha zawka ngaih ni mah se hneh ngei an tum tur thu a sawi.