EPL Hall of Fame-ah Shearer leh Henry

Alan Shearer leh Thierry Henry te chu Premier League Hall of Fame-ah lakluh an ni a, hetiang huanga player lakluh hmasak ber an ni. EPL Hall of Fame hi kumin April 19 aṭanga an kalpui ṭan chauh kha a la ni.

England striker hlui Shearer hi Premier League goal khung hnem ber (260 goals) dinhmun chelhtu a ni a, 1995 khan Blackburn Rovers chu league nomawi chawi puiin, a hnuah Newcastle United tan ropui takin a khel bawk.

Henry hian Arsenal tan EPL match 258 a khelh aṭangin goal 175 a khung a, a zawnin season li chhung 'Top Scorer' ni thei awmchhun a ni a, Gunners tan hian league nomawi pahnih a chawi - 2003-04 season khan hneh loh nei loin an champion.

Kum 50 mi Shearer chuan, "Premier League-ah hian player ropui leh ṭha ber ber an awm a, an chhuak thar reng bawk. Chutiang karah a vawi khat nan player ropui Henry nen Hall of Fame kan chang hi ka lawm takzet," a ti.

Goal khung chauh ni lo, ṭhiante khung tur siamsak pawh a thiam, EPL assist vawi 74 neitu Henry chuan, "Premier League Hall of Fame-a lan hi a ropui, a bik takin Alan Shearer nena din dun hi a ropui zual hle bawk.

"Ka naupan lai chuan engtin nge boot ka neih theih ang tih ka ngaihtuah a, tunah chuan Hall of Fame kan sawi ta der mai. Theihtawp chhuaha ka inkhelhna kha miten min lo hriatsak ve a ni," tiin a sawi.