Clay-ah Nadal a champion

Rafael Nadal chu 'King of Clay' a la ni reng. Spanish tlangval hian championship point a inchhanhim hnuah, a khingpui Stefanos Tsitsipas chu 6-4, 6-7(6), 7-5 a hnehin a vawi 12 nan Barcelona Open nomawi a chawi.

Pathianni zan final-ah player pahnih an inkhel tawk hle, seeded pakhatna Nadal hi set hnuhnung berah 4-5, 30/40 in a hnufual hman, point khat chauh pawh hloh zeuh se la chuan a chak lo dawn tihna a ni hman.

Mahse, a inkhelh thiamna leh title a lak fo tawhna a nih avangin a zam phah chuang lo. Set thumna tie break khelh puiin, darkar thum leh minute 38 an inkhelh hnuah tawnhriat ngah leh player ṭha zawk Nadal bawk a chungnung.

Kum 34 mi Nadal chuan, "He hmuna hlawhtlinna chan hi ka tan chuan a hlu takzet, hma ka sawn zel vanga hetiang dinhmun thleng thei hi ka ni. Tunah chuan French Open atan kawng dik ka zawh niah ka ngai," a ti.

World ranking chhuak tharah chuan Nadal hi pathumna aṭangin pahnihnaah a kai chho dawn. Clay court season an hman chhunzawm dawn a, a inkhelh thiamna hmunah hian nomawi dang pawh a chawi belh ngei a rinawm.

Tun thaltir lam khan Monte Carlo Masters-ah Nadal a inlan a, beisei a phak lo. World number 3 a hlawhtlin loh lai hian Tsitsipas a champion thung. Greek tlangval hian Barcelona-ah pawh ṭha takin inelna a hmachhawn zui leh a, a tum ram erawh a thleng zo ta lo.

January thla khan Australian Open quarterfinal-ah player pahnih hi an lo intawng tawh, set hmasa pahnihah Nadal chungnungin nuamsa taka chak tura ngaih a ni. Mahse, Tsitsipas-a'n set hnuhnung pathum lain a tlang ta zawk.

Kum 22 mi Tsitsipas hian theihna sang tak a nei, tun hnaiah a khelh ṭhat bawk avangin Roland Garros-ah pawh Nadal chhaih buai thei tur zinga mi a ni ang, major title la tur erawh chuan a rilru a tih paukhauh zual deuh a la ngai dawn niin a lang.