Barca chak laiin Atletico an chak lo - champion tur a chiang lo!
European top five league zingah La Liga tluka champion inum boruak sang a awm lo - Pathianni zan khan Barcelona chuan 2-1 in Villarreal an hneh a, Atletico Madrid chu Athletic Bilbao lakah 2-1 in an tlawm thung!
Atletico hian point 73 nen table chung ber luah chhunzawm mah se pahnihna Real Madrid leh pathumna Barcelona aia an sanna chu point hnih chauh a ni a, Catalan club hian match khatin an khel tlem bawk. Hetihlai hian thai bo thiang lo Sevilla chuan 2-1 in Granada an hneh ve bawk a, anni hian hmahruaitu Atletico an phak lohna chu point thum chiah a ni ta bawk - champion thei zingah an tel.
La Liga top four chin hi a hnuai lam tan um phak theih an ni tawh lo a, season tharah Champions League khel turin an tling chiang vek tawh.
Spanish top flight league ngaihnawmna belhchhah turin Barca hi Atletico nen May 8-ah an la intawng dawn a, Real vs Sevilla chu May 9-ah kan hmu dawn bawk - a tawi zawnga sawi chuan La Liga-ah champion thei team pali an awm.
Barca an chak
Inrinni zanah Real-in Real Betis (0-0) an inhnehtawkpui a, he thu hre sain Pathianni zanah Barca an inlan. Mahse, goal khung hmasa zawk erawh mualneitu Villarreal an ni a, Samuel Chukwueze chuan minute 26-naah Barca-a barakhaih.
Villarreal hlim chhung erawh a rei lo - goal an khung aṭanga minute hnih hnu lawkah Barca-in an chhanglet ve nghal a, Antoine Griezmann chuan finishing tawih zet hmangin si phurh hi a sut.
Minute sarih a liam a, Barca bawkin an khung nawn a, a khungtu pawh Griezmann bawk a ni. French striker hian Villarreal centre back Juan Foyth-a back pass sual a nangching a, remchangah lain an goal hnihna a khung.
Villarreal midfielder Manu Trigueros chu minute 65-naah Messi laka a foul avangin hnawhchhuah zui a ni a, Yellow Submarine tan thawhleh ngaihna a awm tawh lo - Barca an chak.
Barca hian tun season-a an league match hmasa 15-ah khan vawi sarih chiah chak an nei a, vawi li an tlawm a, vawi li an khingpui an inhnehtawkpui. Mahse, Barca hi an league match hnuhnung 17-ah vawi khat chiah an tlawm a, vawi khat draw an nei - vawi 15 an chak a, champion an sawi ri ta.
Atletico an tlawm
Barca chak thu hre sain Atletico an inlan a, mahse, Bilbao khelmualah point an hlawh chhuak thei lo - minute riatna lekah Atletico hian goal an chhuah a, Alex Berenguer chuan Bilbao tan hmahruaina goal-a khung.
Atletico lamin a sutna tur an neih lawk theih loh hnuin Stefan Savic chuan minute 77-naah a khung ve leh a, mahse, Diego Simeone-a naute hlim chhung a rei lo - hun tawp nan minute li chauh a awm tawh tihah Inigo Martinez chuan a khung leh a, Atletico tan chhanletna hun a awm tawh lo.
Barcelona-in Ningani zan dar 10:30-ah Granada an mikhual dawn a, Atletico khelh zat an khel chiah ang a, hnehna an chan chuan point khatin La Liga hmahruaitu hi an tlanpel bawk ang.
Atletico dinhmun a derthawng ta viau a, mahse, dem tur an awm a nih chuan anmahni bawk in dem tur an ni - Bilbao lakah pawh first half-ah an nawi a, keeper ṭha mi Jan Oblak-a'n Asier Villalibre shot a dan te, Oihan Sancet-a'n a hun ṭha neih vawi hnih a khawhral te kha lut ngat se hei aia mualpho zawk thei an ni.
Sevilla-in 2-1 in Granada an hneh ve bawk a, Ivan Rakitic (penalty) leh Lucas Ocampos-ten goal khat ve ve an khung a, Granada-in minute 90-naa Robertso Soldado penalty hmanga an chhanlet meuh chuan a tlai tawh.
