Jadeja-a'n over khatah run 37 a siam

Pathianni zan khan Chennai Super Kings-in run 69-in Royal Challengers Bangalore an hneh a, Ravindra Jadeja chuan over khat lekah run 37 teuh meuh a vaw chhuak.

Wankhede Stadium-a inkhelah Chennai-in an bat hmasa a, Ravindra Jadeja chuan over tawp berah Harshal Patel ball vawm chu stadium hmun kil tinah a vaw chhuak. Jadeja hian a zawn zatin six vawi li a vua a, heng zinga pakhat hi 'no ball' a ni.

Hemi hnu hian two, six leh four a vaw leh bawk. Kum 2011 khan West Indies batsman Chris Gayle-a'n Royal Challengers Bangalore tana a khelh laiin Kochi Tuskers Kerala lakah over khatah run 37 a lo siam tawh a, Jadeja hian Gyale a record a nih rual chiah.

Jadeja hian run 62 a siam a, Faf du Plessis-a'n run 50 siam ve bawkin over 20-ah Chennai-in run 191/4 an siam avangin chak turin an dinhmun a ṭha hle. Super Kings-in an vawm hnuah pawh Jadeja a khel ṭha chhunzawm hle, Indian all rounder hian wicket thum lain run 13 chauh a pe a, Bangalore batsman Daniel Christian chu a run out tir bawk.

Bangalore-in run 122/9 chauh an siam a, Jadeja chet ṭhat zarah Chennai Super Kings chiang takin an chak. IPL inkhel dangah Delhi Capitals leh Sunrisers Hyderabad te over 20-ah run 159 ve ve siamin an inhnehtawk. Super Over-ah Hyderabad tan Kane Williamson (4*) leh David Warner (2*) te lutin run sarih an siam a, Delhi tan Axar Patel-a'n a vawm.

Super over-ah Sun-risers tan Rashid Khan-a'n vawm ve thungin Rishabh Pant-a'n run nga a siam zarah Delhi-in run riat an siam a, ball dah ban nei loin hnehna an chang. Zanin dar 7:30 hian Delhi Capitals leh Royal Challengers Bangalore te Narendra Modi Stadium-ah an inhmachhawn ang.