Coronavirus-in IPL-ah nghawng a nei ṭan

Australian player Adam Zampa leh Kane Richardson te chuan an hnampui Andrew Tye hnung zuiin Indian Premier League (IPL) khelh chhunzawm loin an ramah an haw dawn. India off-spinner Ravichandran Ashwin pawhin a chhungte awmpui turin Indian Premier League aṭangin chawlh a la bawk.

India ramah Covid-19 a hluar zel a, oxygen leh ventilator indaih lohnain harsatna hi a belhchhah. Hrileng karah IPL khelh chhunzawm zel mah se nunna thapa khel zui ngam lo an awm ṭan. Rajathan Royals player Tye chuan Pathianni khan Sydney a pan. Tye chuan, "Inkhung hran reng ngai hian rilru a ti buai a, Covid-19 vangin mahni rama haw theih loh ka hlau bawk. Ka thutlukna siam ang hi player dangte pawhin zawm ve an duhin ka hria," tiin a sawi.

Nimin khan Royal Challengers Bangalore chuan thuchhuah siamin kum 29 mi leg spinner Zampa leh fast bowler Richardson te chu mimal thil vanga an rama an haw avangin an chhawr zui theih tawh loh tur thu an puang bawk.

IPL-a khel Australian player pathum an ram lamah haw mah se player ṭha eng emaw zat an la awm a, chung zingah chuan batsman ṭha mi Steve Smith leh David Warner bakah bowler ṭha Pat Cummins te an tel a ni.