Elland Road-ah goal a lut lo

Manchester United-in Old Trafford-ah Leeds United 6-2 in an sawp a, Pathianni zan khan Elland Road-ah club pahnih hi inkhel lehin 0-0 in a inhnehtawk. Marcelo Bielsa kaihhruai Leeds-in goal khung ringawt an tum tawh lo a, Premier League-a team ṭha ni tura pawimawh goal venhim pawh an thiam belh zel niin a lang.

Ole Gunnars Solskjaer hote erawhin point khat chiah an hmuh avangin match nga khelh tur la awmah hmahruaitu Manchester City point 10-in an pha lo a, nomawi beisei ngam chi a ni tawh lo.

Goal chance a tlem
Elland Road-ah goal hmuh tur a awm lo a ni ringawt lo a, goal chance pawh a tam tawk lo. First half-ah Jack Harrison-a cross chuan Luke Shaw kut a fuh niin a lang a, penalty chu pe se inkhel ti danglamntu tur a ni thei ang.

Marcus Rashford-a freekick pet pawh Leeds keeper Illan Meslier-a'n ṭha takin a dang a, amaherawhchu goal zawnah a kal lo leh an block hman zel avangin Meslier hian hna a nei zui meuh lo. Hriat tel tur erawh Man United tan hian Paul Pogba leh Edinson Cavani ten inkhel bul an ṭan lo.

Tun hnaia che ṭha em em Mason Greenwood-a'n goal khung tum ṭhin viau mah se Leeds United ten a hmawr bawk thei lo turin an dang bet thei a, United chhuanvawr Bruno Fernandes pawh mamawh chhanna a ni thei lo. United-in ball chang tam zawkin goal chance pawh ngah hret mah se chak an phu bik lo a, goal awm loa inhnehtawk hi result awm tak a ni.

Eng nge an sawi?
Leeds United manager Bielsa chuan, "Goal kan venhim ṭhatna inkhelah chuan kan duh angin kan attack ṭhin lo. Inkhel thunun lo mah ila kan khel chhe zawk tihna a ni lo a, kan khelh danah hmasawnna hmuh tur a awm. Ka player-ten an tihsual aṭangin an insiamṭha zel a, an puitlin belh zelin ka hria," tiin a naute a fak.

Bielsa hote hian Man United an chelh hma hian Leicester City leh Manchester City an hneh tawh bakah Chelsea leh Liverpool an chelh tawh bawk. Leeds hian point 47 an hmu a, an relegate dawn lo tih a chiang tawh a, an vanneih chuan season tharah Europa League an la khel thei ang.

Manchester United mana-ger Solskjaer chuan, "Second half-a inkhel kan thunun ang khan Leeds laka inkhel thunun thei hi ka hmu tam lo. Chance ṭha kan nei tam lo a, kan neih chhun kan hmang ṭangkai lo. Manchester City pressure pek ve reng kan duh avangin kan tan chuan draw hi a pawi hle a ni," tiin a sawi.

Solskjaer-a hote hian April 29, Ningani zan dar 12:30-ah AS Roma nen Old Trafford-ah Europa League semifinal first leg an khel dawn a, May 2, Pathianni zanah an hmelma Liverpool an mikhual zui ang.