Inter Milan tan nomawi a chiang thawkhat
Antonio Conte enkawl Inter Milan tan Serie A nomawi chu chawi mai theih turin a in chhawp hnai ta. Inter hian Matteo Darmian-a goal khat hmangin Hellas Verona 1-0 in an hneh a, league table-ah point 13 zetin hma an hruai fal ta.
Nizan khan AC Milan an inlan a, result kan hre hman lo. Milan hi an chak a nih chuan Inter nena an inkar an ti zim leh hret ang, khelh hmabak match nga chauh a awm tawh avangin Conte naute tan 'Scudetto' chu a hmin thawkhata ngaih theih a ni.
Champion zia
Inter hian an khelh ṭhat tawk loh ni pawhin point an hmu zel. Pathianni zan San Siro-a inkhelah pawh goal a lut mai lo, table laihawla awm Hellas Verona lamin Inter hmatawngte an dang rei thei hle a, point an hlawh chhuak dawn ni pawhin a lang hman.
Ball chang hnem chunga inkhel thununtu Inter erawh dan reng theih an ni lo. Minute 76-naah Manchester United defender hlui Darmian chuan goal awmchhun a khung, season duhawm hmangtu Inter tan goal khat hi point thum hmuh nan a tawk.
Conte chuan, "Kan match hnuhnung pahnihah Napoli leh Spezia te nen 1-1 ve vein an inhnehtawk. Hells Verona lakah eng ang result nge kan mamawh tih chu kan hre tlang vek. Tharum ngah Verona hmachhawn dan tur kan zir lawk a, a takin kan hmang chhuak.
"Match khelh tur a tam avangin ṭha taka khelh reng theih a ni lo, harsa taka point kan sual chhuak ṭhin hian min ti lawm. Hnehna chan kan duh a nih chuan kan taksa mai bakah rilru thlenga inbuatsaih a pawimawh," a ti.
Juve an chelh
Champion lai Juventus ke chheh a rem hleithei lo. Old Lady hi an mikhualna ramah Fiorentina nen 1-1 in an inhnehtawk, Turin club hian Alvaro Morata hmanga an si phurh sutin point khat an hlawh chhuak hram.
A hliam dam hnuah Cristiano Ronaldo-a'n ngai a la awh leh lo a, goal a nei lo chhunzawm zel. Fiorentina tana Dusan Vlahovic-a penalty khung chu Morata-a'n a sut a, goal dang luh belh loin point khat ve veah an lungawi a ngai.
Juve manager Andrea Pirlo chuan, "Champions League khelhna tur hmun inchuh lai kan ni a, khatianga khel tur kha chu kan ni lo. Goal kan nawr na lo hle, tlarhnung a nghing bawk. Khelmual chhungah theihna sang ber kan hlan a ngai a ni," a ti.
A zawna season kua league champion ni thei Juve hi palina an ni mek. Pangana Napoli aiin match khata khel tam chungin point thum chauhin an sang zawk a, match khat chetsual hleka tlahniam nghal thei an ni - UCL khelh tum tan chetsual a pawi thui tawh ang.
