3 points nei hnem ber Curry

Stephen Curry chu thla khat chhunga NBA huang chhunga 3 point nei hnem thei ber a ni. Nimin zing NBA regular season inkhalah Curry hian point 37 neiin State Warriors chu Sacramento Kings lakah 117-113 in hnehna a chanpui.

American guard Curry hian Kings lakah 3 point vawi sarih a nei a, April thla chhunga vawi 85 a neihna chiah a ni. Thla khat chhunga 3 point nei hnem record hmasa chu James Harden siam niin, November, 2019 khan vawi 82 a nei.

April thla chhungin GSW hian match khelh hmabak pahnih an la nei a, player ṭha bik Curry hian ama record neihsa hi a belhchhah chho zel ngei ang. Warriors coach Steve Kerr chuan, "Hmuhnawm thlir a thlir tawp chi a ni," tiin a sawi hial.

Nimin zing inkhel dangah Kyrie Irving-a point 34 leh Kevin Durant-a point 33 neih hmangin Brooklyn Nets chuan Phoenix Suns lakah 128-119 in hnehna an chang. Nets hian NBA regular season kal laiah match 42 hnehna an chang a, eastern conference hmahruaitu an ni.

Nets hian James Harden an la chhawr thei lo. Mahse, forward Durant a lo kir tawh thung a, champion tum ngam team hian Suns lakah harsatna lian tham an tawk lo - quarter hmasa ber tih lohah chuan an chungnung zawk vek.