Baggies tan tlak a hnai

West Brom-in injury time-ah goal an chhuah a, an mikhualna ramah Aston Villa nen 2-2 in an inhnehtawk - tla thei dinhmuna ding mek Baggies tan point thum a hlu a, an hlawh chhuak mai tawh tura an inngaih hnuah point hnih hloh chungin an haw.

Villa Park-a inkhelah mualneitu lamin penalty an hmu hma a, Semi Ajayi chuan Ross Barkley-a tih tluk avangin minute kuana lekah penalty a chawi - Anwar El Ghazi chuan harsatna nei loin goal-ah a chantir.

Mahse, Baggies lamin huaisen takin an bei let a, minute 23-naah Ainsley Maitland-Niles laka foul Villa centre-back Ezri Konsa chuan penalty a chawi ve thung. Matheus Pereira-a lo pen chhuak a, Baggies tana beiseina siam turin goal-ah a chantir.

Baggies an phur tawlh tawlh a, Pereira-a'n freekick hmanga bar a tih per hnuah Okay Yokuslu leh Maitland-Niles-ten a chance siamsak goal-ah an chantir thei lo a, minute 47-naah Mbaye Diagne shot Tyrone Mings-a'n an lama a tih luh erawh Villa keeper Emiliano Martinez tan dan theih a ni lo.

Sam Allardyce-a nauten he goal hi an chakpui mai tawh dawn niin a lang a, mahse, beidawng duh lo Villa tan Keinan Davis chuan hun pek belh minute hnihnaah si phurh a rawn sut - hun tawp ham rik a ri zui a, league match nga chauh khelh tur awm tawhah Baggies hian a him china awm Brighton & Hove Albion chu point kuain an phak lo mek.

Pathianni zan inkhel dangah Burnley-in Premier League khelh chhunzawm an tum tih pholangin Wolver-hampton Wanderers chu 4-0 in an sawp a, Chris Wood chuan hattrick siamin Ashley Westwood chuan goal khat a khung ve bawk.