A chung berah Lille

Goal hnih chhuah hmasa mah se Lille an beidawng duh lo. Christophe Galtier naute hian huaisen taka bei letin an khingpui Lyon 3-2 in an lehthal - French Ligue 1 table chung berah an awm leh ta.

Champion lai Paris Saint-Germain-in Inrinni zan khan hnehna an chang a, hmahruaitu an ni lailawk. Mahse, Pathianni zanah Lille hian title an chuhpui team an hneh leh tak avangin hmahruaitu an inthlak.

Mualneitu Lyon lamin minute 20-na lekah Islam Slimani hmangin goal hmahruai an khung, defender Jose Fonte chuan anmahni lamah a ti lut palh bawk. Lille lamin chawlhlawk hma chiahin Burak Yilmaz hmangin si phurh an sut ṭhen.

Second half-ah Lille lamin Jonathan David hmangin si phurh an sut zo, striker Yilmaz chuan hun tawp hma minute nga chauh awm tawhah chakna goal a khung a, league nomawi an beiseina a sang zual bawk.

Ligue 1 hi khelh hmabak match 34 chauh a awm tawh a, hmahruaitu Lille leh pahnihna PSG inkarah point khat chauh a awm - pathumna AS Monaco pawh an elpui pahnih an chesual a nih chuan match khat chak leka hmahruaitu ni thei an la ni.