Zaninah tum ram la thleng lo pahnih Paris Saint-Germain Vs Manchester City

Pep Guardiola chuan tun season Champions League-a hneh loh la tawng lo Manchester City chu nikum finalist Paris Saint-Germain hmachhawn turin Paris khawpuiah a hruai dawn. Zanin dar 12:30-a Premier League hmahruaitu leh French champion inkhel tur hi football fixture ṭha bik a ni a, football ngainatute tan chuan hmaih phal chi a ni lo.

PSG leh Man City hian European champion nih tumin sum ṭhahnem tak an seng tawh a, an hun a la inher chhuak lo. Kuminah hun ṭha inherchhuah an beisei a, mahse pakhat tan chauh hmun a awm. Final khelhna tur hi Ataturk Olympic Stadium pan tur zawk zawnna hi en a châkawm takzet.

PSG chu...
PSG hi French club ṭha zinga mi an ni ve hrim hrim a, khawvel huapa player ropui George Weah leh Ronaldinho te hming chher tawhna club a ni. Tun hnua French football an thununna chhan erawh sum a ni a, kum 2011-a Qatar Sports Investments (QSI) an lei aṭangin team dang daih an ni.

French club hian sum an ngah miau avangin player langsar khelh ṭhat duh lohna Ligue 1-ah hming langsar Zlatan Ibrahimovic, Thiago Silva, Edinson Cavani leh Neymar te an lalut thei a, a bik takin Barcelona aṭanga pound maktaduai 200 senga Brazilian forward an lalut thei hi a ropui lehzual.

Kum 2013 aṭangin PSG hian Ligue 1 nomawi an chawi chho ta char char a, kum 2017-ah Monaco an rawn tla zep zeuh tih loh chu an champion vek. Parisians hian pound maktaduai 166 vel sengin Monaco champion puitu Kylian Mbappe an chhuhsak nghal a, an elpui player ṭha an chhuhsak theih miau avangin Ligue 1 inelna hnuhnung pariata vawi sarih an champion hi a mak lo.

Amaherawhchu French football thunun ringawt hi club thuneitute duh dan a ni lo a, Champions League nomawi an duh. Hemi a nih avang hian manager ṭha Carlo Ancelotti, Laurent Blanc, Unai Emery leh Thomas Tuchel ten an hna an chan tawh. Tuchel-a ho hian season liam ta khan final an thleng a, Bayern Munich an hneh lo. Tun season-ah erawh Mauricio Pochettino kaihhruainain Bavarians lakah phuba an la tawh thung.

Man City hi...
Manchester City hi English club vantlang an ni a, Premier League awm hnuah pawh ṭum thum ngawt an relegate. Amaherawhchu, kum 2008 khan Abu Dhabi United Group-in Man City hi a lei a, English club hmel hmang chu zawi muangin a danglam chho hre hret.

Roberto Mancini hoin 2011 FA Cup nomawi an chawi a, final-ah Stoke City an hneh. Hriat tel tur erawh Man City hian semifinal-ah an hmelma Sir Alex Ferguson-a enkawl Manchester United an hneh a, ṭhenawm bengchheng satliah a ni tawh lo.

Man City an vul chho zel a, 2011-12 season-ah Italian manager Mancini ho bawkin Premier League leh FA Cup nomawi an chawi a, club hmel hmang a dang ta vek. Kum 2013-ah Manuel Pellegrini lalutin 2014-ah Premier League leh League Cup a champion pui a, amaherawhchu City hotute mit a tlung zo lo.

Chilean manager Pellegrini ho hian 2015-16 season-ah nomawi zawng zawng chawi thei dinhmunah an ding a, heti chung hian City chuan season tharah Guardiola an lakluh tur thu an puang. Pellegrini kaihhruai City-in ngai an awh thei tawh lo a, League Cup bak an champion lo.

Spanish manager Pep-a'n duh dan bik te a nei a, thawm ring tak rawn nei mah se season khatnaah a arte lu kawn a, sawisel a hlawh. Mahse, coach ṭha bik Guardiola a duh thala an chet chinah nomawi an chawi ta zut zut; Premier League vawi hnih, FA Cup vawi khat leh League Cup vawi li an chawi tawh.

Chutihrualin Man City hotute duh ber Champions League erawh an la chawi thei chuang lo a, chawi a hnekin quarterfinal bak an la thleng lo. Tun season-a Pep-a hnuaia Champions League-a an thlen san ber ṭum a ni.

Team ṭha bik 2
PSG-in Poch-a hnuaiah Trophée des Champions-ah an chak a, nomawi an chawi tawh a, chutihrualin he inelna hi English football chu ni se Community Shield tlukpui chauh a ni. Amaherawhchu French club hian Champions League bakah nomawi chawi theih dang Ligue 1 leh Coupe de France-ah champion an la beisei ve ve. Ligue 1-ah PSG hi pahnihna ni mah se pakhatna Lille hi point khat chiahin an pha lo.

Coupe de France semifinal-ah Marseille an la hmachhawn dawn bawk a, season bul an ṭan ṭha lo chunga nomawi chawi theih zawng zawng chawi thei dinhmuna an la ding vek hian an club ṭhat zia a pholang.

Man City pawh hi hun rei tak chhung nomawi pali chawi thei dinhmunah an ding a, amaherawhchu FA Cup semifinal-ah Chelsea an hneh loh avangin thil harsa bik hi an ti thei dawn ta lo. Chutihrualin Man City hian League Cup nomawi an chawi tawh a, Premier League nomawi an chawi ngei a rinawm tawh a, Champions League-ah an insawrbing theih tawh.

Thlirna Tawi
Bul ṭan tura beiseite
PSG : Navas; Florenzi, Marquinhos, Kimpembe, Diallo; Gueye, Paredes;
   Di Maria, Verratti, Neymar; Mbappe
Man. City: Ederson; Walker, Stones, Rúben Dias, Cancelo; Rodri
   Gündogan; Mahrez, De Bruyne, Foden; Bernardo Silva
• PSG player Bernat chu khum hliam vangin a inkhel thei dawn lo a, Marquinhos pawh inhliam vangin a dinhmun a chiang lo. Man City-ah inhliam vang emaw hrem vang emaw a khel thei lo tur an awm lo.
• PSG leh Man City intum hmasak ber chu 2008 UEFA Cup-ah a ni a, 0-0 in Manchester-ah an inhnehtawk.
• Kum 2016 khan UCL quarterfinal-ah an inhmachhawn a, Paris-ah 2-2 a inhnehtawk hnuin Etihad Stadium-ah City 1-0 in an chak. First leg leh second leg-ah Kevin de Bruyne-a'n goal a khung ve ve. Hemi ṭuma City manager hi Manuel Pellegrini a ni.
• Man City hian kumin UCL-ah hneh loh an la tawng lo. Group stage-ah Porto, Olympiakos leh Marseille nen awm hoin Porto nen ṭum khat an inhnehtawk tih loh chu an chak vek. Last 16-ah City hian Borussia Monchengladbach 2-0 ve ve a hnehin aggregate-ah 4-0 in an chak a, quarterfinal-ah Borussia Dortmund 2-1 ve ve a hnehin aggregate-ah 4-2 in an chak.
• PSG hi RB Leipzig, Manchester United leh Istanbul Basaksehir te nen group khatah an awm a, Leipzig leh Man United hi vawi khat ve ve hneh lo mah se group hmahruaitu an ni. Last 16-ah Barcelona khelmualah 4-1 in a chak a, an mualah 1-1 a inhnehtawkin aggregate-ah 5-2 in an chak. Quarterfinal-ah PSG hian champion lai Bayern hmachhawnin Allianz Arena-ah 3-2 in an chak a, an mualah 1-0 in chak lo mah se away goal rule hmangin semifinal an lut.

Mbappe leh Neymar telna PSG
Kumin Champions League semifinal-ah champion ngun ber Real Madrid leh nomawi chawi tawh Chelsea la dam mah se champion tura rinkai pahnih chu la champion lo Paris Saint-Germain leh Manchester City an ni. PSG hian French football an thunun a, season liam taa finalist an nih avangin dah hniam theih an ni lo.

PSG danglamna chu player ṭha bik Kylian Mbappe leh Neymar an kawl hi a ni a, hemi te pahnih hi danglamna thlen thei ve ve an ni. Mbappe hian a tlan chakna hmangin a khingpuite tlarhnung a pal darh ṭhin a, Neymar-a'n a thiamna leh finna hmangin a khingpuite a chaih kual ṭhin bawk.

Football expert tam tak Neymar hi PSG innghahna tak tak zawkah an ngai a, Lionel Messi leh Cristiano Ronaldo te huanga a awm lohna chhan chu a rilru put hmang vang chauhah a ngai. Neymar hi a pawimawh tehmeuh mai a, chutihrualin PSG tana ṭangkai zawk chu Mbappe a tih theih.

Kum 22 mi Mbappe hi Nou Camp-a hattrick siam thei a ni a, Allianz Arena-a goal hnih khungtu a ni bawk. Tun season-ah pawh PSG tana goal khung tam ber niin inelna hrang hrangah goal 37 tehmeuh a khung tawh a, inhliam vanga khel tam tawk lo Neymar-a'n goal 14 chauh a la khung thung.

Mbappe hian kar tawpa Metz an hneh ṭumin goal hnih a khung a, mahse hliam vangin minute 87-naah an la chhuak. French media lam chuan Mbappe chungchang hi an ngaihven nasa, Mauricio Pochettino-a'n a chhawr theih a inring. Mbappe leh Neymar an dam ṭha a nih ngat chuan Man City tlarhnung an chhaih buai khawp ang.

Chutihrualin PSG hi player pahnih ringawta innghat an ni lo. An keeper Keylor Navas hian Champions League-ah Real Madrid vawi thum a chawipui a, tun season-ah a che ṭha bawk nen UCL chawi tura duan tih hiala an sawi a ni.

Midfielder Marco Verratti thiamzia sawi nawn a ngai tawh lo a, Italian midfielder inkhel en ṭhin tan hmuh hmaih theih a ni lo. Argentine forward Angel di Maria lah 2014 Champions League final-a man of the match a ni.

Dias-a dinpui tur Stones nge Laporte?
Manchester City-in Mauricio Pochettino club hlui Tottenham Hotspur hnehin League Cup nomawi an chawi a, amaherawhchu Pep Guardiola hian Poch-a enkawl team hi a theihnghilh thei lo ang.

2018-19 season khan Poch-a kaihhruai Spurs leh City te chu 4-4 in an inhnehtawk a, hun tawp hma hretin Raheem Sterling-a'n Pep-a hote tan chakna goal a khungah an ngai. Amaherawhchu, VAR hmangin pawm a ni lo a, away goal rule hmangin Argentine manager hote an vannei ta zawk.

Tun ṭuma an intawn lehna turah erawh Man City hi team dang daih an ni tawh. Tlarhmaa rinrawl ni ṭhin Sergio Aguero-a'n rin a hlawh tawh lo a, goal nawr turin Phil Foden leh Kevin de Bruyne te an awm a rinawm.
Tlarhnung pawh a danglam tawh. Vincent Kompany a awm tawh lo a, a kawppui ṭhin Aymeric Laporte pawh rinrawl a ni ta bik lo. City tlarhnungah Ruben Dias a chiang a, a kawppui tur hi John Stones nge ni dawn Laporte tih hi zawhna awm thei tak a ni.

English defender Stones hi kuminah che ṭha viau mah se match hnuhnung paliah a khel ṭha tawk lo a, hrem vangin League Cup final a khel thei lo bawk. Hetihlai hian French defender Laporte erawhin Spurs lakah chakna goal a khung. Pep Guardiola tan pawh thutlukna siam harsa tak a ni ngei ang.