FIGC-in club hremna dan thar a siam

Italian Football Federation (FIGC) chuan FIFA leh UEFA hriatpui loh inelnaa inrawlh club-te tan Serie A aṭanga paih chhuah dan thar a siam.

Dan thar awm chhan hi Italian football club pathum Juventus, Inter Milan leh AC Milan te chu European Super League-a tel tuma hming an pek ve vang a ni ber. ESL-ah hian Italian club bakah Real Madrid, Barcelona, Atletico Madrid, Manchester United, Manchester City, Liverpool, Arsenal, Chelsea leh Tottenham te an tel an ni.

Club 12 zinga pakua an inhnuhdawh tawh laiin tun thlengin Juventus bakah Barcelona leh Real Madrid te an la inhnukdawk ve lo.

FIGC president Gabriele Gravina chuan, "Tun din-hmunah chuan Super League-a tel mek leh chhuak pawh kan hre lo. Amaherawhchu national championship tel tura inziahluh hun tawp June 21 hnua mimal league zawm chu championship-ah an tel lo ang," tiin a sawi.

Italian club-ten June 21 thleng Italian Football Federation hnuaia inelna tel turin an inziak lut thei dawn a, mahse mimal buatsaih emaw thuneitute hriatpui loh inelna emaw an zawm loh tur thu an intiam a ṭul dawn.

April 18-a European Super League a awm tur thu puan a nih khan inelna hmachhawn tur club-te khan an ram league khelh an la tum thu an sawi tel a, hetia dan thar a awm takah chuan Italian club tan chuan awm zel theih a ni dawn tawh lo. Juventus pawhin AC Milan leh Inter Milan hnung zuiin an inhnuhdawh thuai a rinawm.